VP Duterte Nabalaka sa Kaluwasan Human sa Arrest Warrant

Miingon si Vice President Sara Duterte nga nabalaka siya sa iyang kinabuhi ug sa kaluwasan sa iyang mga anak human nagpagawas ang Quezon City Regional Trial Court (RTC) og warrant of arrest batok kaniya kalabot sa grave threats charges.

Sa usa ka pahayag, gipadayag ni Duterte nga iyang nadokumento ang mga hulga ug pagpangharass batok kaniya sukad 2023. Gidugang niya nga nabalaka siya sa kaluwasan sa iyang mga anak.

“I have documented threats and harassment since 2023. I fear for my children. I do not feel they are safe if I am with them,” matod ni Duterte.

Giangkon usab sa Vice President nga miadto ang mga pulis sa lugar diin atua ang iyang mga anak bisan nakagikan na siya aron moatubang sa korte.

“Umalis na nga ako kung nasaan mga anak ko para pumunta sa korte pero pumunta pa rin ang pulis,” matod niya.

Gipahayag ni Duterte nga dili siya mobati nga luwas taliwala sa maong mga panghitabo.

“I do not feel safe. Pakiramdam ko papatayin nila ako,” matod niya.

Gikumpirma sa kampo ni Duterte niadtong Biyernes, Setyembre 4, nga nagpagawas ang Quezon City RTC og warrant of arrest batok sa Vice President.

Gikumpirma ni Atty. Paul Lawrence Lim, abogado ni Duterte sa grave threats cases nga resulta sa imbestigasyon sa National Bureau of Investigation (NBI), ang pagpagawas sa warrant.

Niadtong Nobyembre 2024, gipahayag ni Duterte nga nagkuha siya og assassin aron patyon si President Ferdinand Marcos Jr., First Lady Liza Marcos, ug kanhi House Speaker Martin Romualdez kung siya mismo mapatay.

Padayon nga gipahayag ni Duterte nga gikuha sa sayop nga konteksto ang iyang mga pahayag ug iyang gihagit ang legal proceedings batok kaniya.

Gipagawas ang warrant samtang padayon nga nag-atubang si Duterte og laing mga hagit sa politika ug balaod, lakip ang impeachment case nga pending sa Senate.

-Ato Ni Bai