VP Duterte: Kanhi Aide Gitanyagan og Kuwarta ug Balay Aron Motestigo Batok Kaniya

Giangkon ni Vice President Sara Duterte niadtong Martes nga ang iyang kanhing aide nga si Jefry Tupas gitanyagan og kuwarta ug puy-anan sa mahalong lugar baylo sa pagtestigo batok kaniya bahin sa giingong paghatod og kuwarta.

Si Tupas, nga kanhi chief information officer sa Davao City sa panahon nga mayor pa si Duterte, nalambigit sa giingong paghatod og kuwarta pinaagi sa affidavit nga gisumite ni dismissed police officer Rodulfo Gracioso Jr. Ang mga alegasyon maoy hinungdan sa imbestigasyon sa National Bureau of Investigation (NBI).

“Kumpirmado ko na merong negosasyon ng pera para sa mga posibleng tumestigo sa imbentong kwento ng maleta ng pera na umano’y ibinigay sa akin doon sa Gracioso affidavit,” matod ni Duterte atol sa press briefing.

Sa iyang affidavit, giangkon ni Gracioso—kanhing security aide ni former House Speaker Lord Allan Velasco—nga naghatod siya og mga bag nga puno sa kuwarta ngadto kang Vice President Duterte, sa iyang igsoon nga si Rep. Paolo Duterte, ug sa ilang amahan nga si former President Rodrigo Duterte, giingong ubos sa sugo ni Velasco. Giila ni Gracioso si Tupas isip usa sa mga tawo nga midawat sa kuwarta alang sa Vice President.

Apan hugot nga gipanghimakak ni Duterte nga nakadawat siya og bisan unsang paghatod og kuwarta sa panahon nga House speaker si Velasco. Iyang gisugyot nga posibleng gipunting ni Gracioso si Tupas tungod kay nakita ang kanhing opisyal sa siyudad nga huyang human siya mawad-an og trabaho.

Matod ni Duterte, gisultihan siya ni Tupas nga giduol siya sa mga kawani sa NBI niadtong Setyembre 29, 2026, sa North Cotabato ug sa sinugdan gitanyagan og proteksyon tungod kuno sa hulga gikan sa pamilyang Duterte.

“Pinuntahan nila si Jefry sa North Cotabato tapos sinabi nila, meron kang threat mula sa mga Duterte kaya kukunin ka namin para i-secure ka. Sinabi ni Jefry, gusto ko ng kasulatan. Sabi nila, magbigay kami ng kasulatan. Ang pinadala nila ay subpoena ad testificandum,” matod ni Duterte.

Dugang niya, gisulti ni Tupas kaniya nga gitanyagan siya og pinansyal nga tabang alang sa iyang pamilya ug balay sa eksklusibong Forbes Park sa Makati City kon mouyon siyang mokooperar.

“Sinabi mismo sa akin ni Tupas na noong pinagtangkaan siyang dalhin ng sapilitan ng mga tauhan ng NBI sa North Cotabato noong September 29, 2026 ay pinangakuan ang kanyang pamilya ng pera, tumira sa Forbes Park, at iba pa,” matod niya.

Wala pa makapagawas og opisyal nga pahayag ang NBI isip tubag sa mga alegasyon sa Vice President.

-Ato ni Bai