VP Duterte Giakusahan ang Marcos Admin sa Pagpaluyo sa mga Alegasyon sa Kuwarta

Direktang giakusahan ni Vice President Sara Duterte niadtong Martes si President Ferdinand “Bongbong” Marcos Jr. ug ang iyang administrasyon nga maoy nagpaluyo sa mga pag-atake sa politika batok kaniya, human sa bag-ong mga alegasyon nga nakadawat siya og mga maleta nga puno sa kuwarta gikan kang former House Speaker Lord Allan Velasco. “Administrasyon. Sino ang nasa likod ng paninira sa akin? Administrasyon. Ang Palasyo, si BBM,”matod ni Duterte sa usa ka press briefing. “Makikita ninyo naman ‘yung mga declarations, mga statements ng Office of the President, eh. Nandyan pa ‘yung impeachment nila,” dugang niya, diin iyang gikonektar ang bag-ong mga alegasyon sa nagpadayong mga paningkamot nga tangtangon siya sa puwesto.

Nagsugod ang kontrobersiya sa affidavit ni dismissed police officer Rodulfo Gracioso Jr., kinsa miangkon nga naghatod siya og kuwarta ubos sa sugo ni Velasco ngadto sa Vice President, sa iyang igsoon nga si Davao City Rep. Paolo Duterte, ug sa ilang amahan nga si former President Rodrigo Duterte.

Hugot nga gipanghimakak ni Duterte ang mga alegasyon ug gipahibalo nga isumite niya ang iyang counter-affidavit sa Huwebes.

Gihimo ni Duterte ang maong mga pahayag samtang misulod na sa ika-34 nga adlaw ang pagdungog sa Senate impeachment court. Bisan aktibo ang iyang legal team sa korte, wala pa personal nga mitambong si Duterte.

Sa laing bahin, giingon sa Vice President nga ang mga kontrobersiya sa korapsyon nga unang nalambigit kang Marcos gipasa ngadto kaniya aron siya maoy target.

“Lahat nung bahid na katiwalian na dapat sagutin ni BBM ay pinapahid niya sa akin. Sa kanya ‘yung issue ng maleta kasi tumanggap siya ng maleta ayon sa testigo ni Zaldy Co. Hanggang ngayon hindi pa sinasagot,” matod ni Duterte, nga nagtumong sa nangaging mga alegasyon ni former lawmaker Zaldy Co bahin sa giingong mga budget insertion.

Niadtong Nobyembre 2025, gipanghimakak ni Marcos ang mga alegasyon ni Co nga siya, kauban si former House Speaker Martin Romualdez ug mga importanteng opisyal sa Gabinete, maoy nagpaluyo sa ₱100 bilyon nga budget insertions atol sa deliberasyon sa 2025 bicameral conference committee. -Ato ni Bai