Senator Alan Cayetano: Pag-usab sa vote threshold mahimong mosangpot sa mistrial

Gipasidan-an ni Senator Alan Peter Cayetano nga ang pag-usab sa gidaghanon sa mga boto nga gikinahanglan aron makonbikto si Vice President Sara Duterte sa iyang impeachment samtang nagpadayon ang trial mahimong mosangpot sa mistrial.

“I don't want to have a mistrial. Ayoko po na maibasura lahat ng trabaho na ginawa sa trial na ito,” matod niya atol sa Facebook livestream niadtong Setyembre 18.

Matod ni Cayetano, nahusay na ang isyu sa dihang nagdesisyon si Presiding Officer Francis Escudero niadtong Hulyo 6 nga gikinahanglan ang 16 ka boto aron makonbikto si Duterte. Walay senator-judge nga mikuwestiyon sa maong desisyon niadtong higayona.

Gipasabot niya nga mao kini ang hinungdan nga tinuyo siyang wala miapil sa misunod nga mga diskusyon kung ang vote threshold kinahanglan bang usbon.

“No offense sa lahat ng amicus na nagbigay ng oras nila, kinikilala ko sila, I honor them, I honor their opinions… Pero hindi pwedeng in the middle of the trial, doon natin pag-uusapan na iibahin natin y’ung rules,” matod niya.

Gipahayag ni Cayetano ang iyang posisyon human naghatag og nagkalainlaing interpretasyon ang upat ka retired Supreme Court magistrates bahin sa constitutional requirement atol sa amici curiae proceedings sa impeachment court niadtong Setyembre 16.

Matod nila retired Chief Justices Hilario Davide Jr., Artemio Panganiban ug Reynato Puno, ang two-thirds requirement dili awtomatikong nagpasabot nga pirming 16 ka boto ang gikinahanglan, ilabina kon adunay senator-judges nga mahimong dili legal nga makaapil.

Lahi ang posisyon ni retired Associate Justice Adolfo Azcuna, kinsa miingon nga ang tanang 24 ka sitting senators kinahanglan magpabilin nga basehan sa pagkuwenta.

Matod ni Cayetano, ang mga numero nga gilatid sa Konstitusyon dili angay isipon nga mahimong usbon depende sa kahimtang.

“Ang numbers sa Constitution ay fixed… Y’ung mga numbers na ‘yan are not arbitrary numbers na nandyan lang,” matod niya.

Gipasabot niya nga ang proceedings kinahanglan hinuon magsiguro nga ang prosecution ug defense adunay igong kahigayonan sa pagpresentar sa ilang tagsa-tagsa ka kaso ubos sa mga lagda nga magpabiling consistent.

Gitakdang paminawon sa Senate impeachment court ang oral arguments sa prosecution ug defense sa Setyembre 23. Human niini, gilauman nga desisyunan sa senator-judges kung ipadayon ba ang kasamtangang ruling ni Escudero nga nagkinahanglan og 16 ka boto aron makonbikto.

-Ato ni Bai