Senate Impeachment Court Posibleng Mobotar Kaduha sa ‘Conviction Threshold’

Posibleng mobotar og kaduha ang Senate impeachment court aron masulbad ang gidaghanon sa mga boto nga gikinahanglan aron makonbikto si Vice President Sara Duterte, bisan pa kon unang balihon sa mga senator-judge ang kasamtangang “hard 16” ruling ni presiding officer Francis “Chiz” Escudero.

Matod ni impeachment court spokesperson Reginald Tongol niadtong Lunes, ang unang pangutana nga atubangon sa mga senator-judge mao kon aprobahan ba ang appeal ni Senator-judge Erwin Tulfo batok sa Hulyo 6 ruling ni Escudero nga nagkinahanglan og 16 ka boto, o two-thirds sa 24-member Senate, alang sa conviction.

“If magkaroon ng majority vote na i-reverse yung ruling, then hindi na 16, hard 16 ang magiging count for the final vote. Now, what number that is, we don’t know,” matod ni Tongol sa usa ka televised interview.

Matod niya, posibleng gikinahanglan ang ikaduhang pagdesisyon aron matino ang bag-ong denominator tungod kay nagkalahi ang kahimtang sa mga senador nga dili karon nag-apil sa trial.

“Baka magkaroon ng next vote again on that matter,” matod niya.

Matod ni Tongol, posibleng kinahanglan nga ilain sa korte ang kahimtang sa usa ka senador nga nanumpa na alang sa impeachment apan absent o naka-medical leave, usa nga detained ug nag-atubang og suspension sa usa ka criminal case, ug lain nga dili maabot sa Senado.

Kining mga kalainan mahimong maoy basihan aron matino kon ang pipila ka mga miyembro magpabilin bang kabahin sa basehan sa pagkalkula sa constitutional two-thirds requirement.

Gitakdang paminawon sa impeachment court ang amici curiae, o friends of the court, sa Miyerkules sa dili pa ipresentar sa prosecution ug defense ang ilang oral arguments sa Setyembre 23.

Matod ni Tongol, target sa korte nga botohan ang appeal ni Tulfo human sa mga argumento sa Setyembre 23, bisan wala pa mahuman ang eksaktong porma sa pangutana nga isumite ngadto sa mga senator-judge.

Escudero Mobotar

Giklaro usab ni Tongol nga moapil si Escudero sa pagboto bisan siya ang presiding officer kansang ruling giapelar.

Matod niya, ang iyang naunang paghisgot sa parliamentary practice sa Senado, diin kasagarang dili mobotar ang presiding officer gawas kon mahimong decisive ang iyang boto, dili makapugong kang Escudero sa pagboto isip senator-judge.

“Siya ay gagamitin niya yung kanyang karapatang bumoto bilang senator-judge din naman,” matod ni Tongol.

Gipasabot niya nga ang impeachment proceeding naglakip sa judicial ug deliberative function diin ang matag senator-judge mahimong moapil sa pagdesisyon sa appeal.

Tungod kay 20 ka senator-judge ang aktibo karon, giila ni Tongol nga ang 11 ka boto mahimong majority kon ang tanang 20 mahimong basehan sa pagboto, apan iyang gipasiugda nga wala pa makadesisyon ang korte kon unsa gyud ang porma sa appeal ug sa bisan unsang mosunod nga pangutana bahin sa threshold.

“We don’t want to preempt the senator-judges on how the votes will happen,” matod niya.

Gipadayon ni Tulfo nga ang iyang appeal wala gituyo aron ipaubos ang threshold alang sa conviction ni Duterte kondili aron maklaro kon ang mga senador nga dili makaapil kinahanglan pa bang iapil sa pag-ihap sa “all the Members of the Senate” ubos sa Constitution. -Ato ni Bai