Senador Alan Cayetano Giawhag ang Supreme Court nga Husayon ang Impeachment Vote Threshold

Giawhag ni Senate Minority Leader Alan Peter Cayetano niadtong Lunes ang Supreme Court nga daliang aksyonan ang mga petisyon nga nagkuwestiyon sa gidaghanon sa boto nga gikinahanglan aron makonbikto ang usa ka opisyal nga gi-impeach, samtang mipasidaan siya nga ang nagpadayong kawalay kasiguruhan mahimong adunay halapad nga epekto.

Gihimo ni Cayetano ang panawagan human adunay duha ka petisyon nga gisang-at sa Supreme Court nga nagkuwestiyon ug nangayo og katin-awan sa paghubad sa Senado sa gikinahanglang boto.

Naggikan ang lalis sa desisyon sa Senado nga usbon ang gikinahanglang boto alang sa conviction gikan sa pirming two-thirds sa tanang miyembro o 16 ka boto ngadto sa 14. Gibase ang kausaban sa gidaghanon sa mga senador nga giisip nga legal ug aktuwal nga makahimo sa pag-apil sa panahon nga ihatag ang hukom.

“At this time, there’s an economic difficulty. Tuloy-tuloy pa rin ang mga tanong sa flood control. It’s a disservice to our nation kung may mga uncertainties,” matod ni Cayetano sa mga tigbalita atol sa usa ka interbyu.

Gipasiugda niya nga ang dali nga desisyon sa Supreme Court makahatag og gikinahanglang katin-awan tungod kay ang paghubad sa gidaghanon sa boto mahimong mahimong basihan usab sa ubang mga kaso gawas sa kasamtangang impeachment trial.

“The earlier that the Supreme Court decides, the better, kasi ’yung numbers na ’yan ay applicable sa marami,” dugang ni Cayetano.

Matod sa Minority Leader, ang desisyon bahin sa gikinahanglang boto mahimong direktang makaapekto sa ubang pamaagi sa Senado ug mga isyu sa Konstitusyon, sama sa pagtino sa quorum, pag-apruba sa mga tratado, gisugyot nga mga pag-usab sa Konstitusyon, ug pagdisiplina sa mga miyembro sa Senado.

Samtang giila nga ang impeachment proceedings naglakip sa legal nga mga lagda ug politikal nga mga konsiderasyon, gipasiugda ni Cayetano nga importante ang klarong mga lagda. Bisan nagpahayag siya og pagsalig sa proseso sa hudikatura, giila niya nga walay kasiguruhan kon kanus-a makahimo og desisyon ang Korte.

“We’re confident in our legal system. But wala naman nakakaalam kasi sa timing, sa pace,” matod niya.

Samtang niini, gisalikway ni Cayetano ang mga kabalaka nga ang nagkalainlaing baruganan sa mga miyembro sa Senate Minority Bloc atol sa trial nakadaot sa ilang panag-uban. Giklaro niya nga ang pito ka minority senators padayon nga nagtinabangay sa mga buluhaton sa paghimo og balaod samtang naggamit sa ilang kaugalingong paghukom isip mga maghuhukom sa impeachment court.

“Working at wala namang animosity ang pitong nandito sa Minority. Walang minority o majority pagdating sa impeachment court,” matod niya. -Ato ni Bai