Sen. Tulfo mipanawagan nga pahimangnoan ang impeachment court spokesperson

Giawhag ni Senator-judge Raffy Tulfo ang Senate impeachment court nga pahimangnoan ang spokesperson niini nga si lawyer Reginald Tongol tungod sa iyang pahayag sa media nga mahimong ipagawas sa Disyembre 16 ang hukom sa impeachment trial ni Vice President Sara Duterte.

Gipataas ni Tulfo ang maong isyu sa ika-33 nga adlaw sa trial, ug miingon nga tungod sa mga pahayag ni Tongol, adunay mga tawo nga mikontak kaniya niadtong weekend ug nangutana kon nakahukom na ba daan ang senator-judges sa kaso.

“Maybe we should give a warning to our spokesperson. People were calling me over the weekend, saying we have prejudged the outcome since Atty. Tongol told the media that we will have a final verdict by December 16,” matod ni Tulfo.

Gihimo ni Tulfo ang maong panawagan human una nang gipahimangnoan sa impeachment court ang mga spokesperson sa prosecution ug defense batok sa pagpahayag sa media bahin sa mga proseso sa trial.

Apan giklaro ni Presiding Officer Francis Escudero nga ang paghisgot ni Tongol sa Disyembre 16 gikan sa pre-trial order sa korte, diin gilatid ang gibanabanang iskedyul sa pagpresentar sa ebidensiya sa duha ka kampo.

Gipasabot ni Escudero nga nakuha ang maong petsa pinaagi sa pagkwenta base sa 61 ka adlaw nga gihangyo sa prosecution sa pagpresentar sa ebidensiya niini ug 30 ka adlaw nga gihangyo sa defense.

“That is based on the calendar in the pre-trial order. It is based on math. It is not based on the realities on the ground,” matod ni Escudero.

Bisan pa niini, mipadayon si Tulfo sa iyang panawagan nga pahimangnoan si Tongol, ug miingon nga sa iyang tan-aw, balik-balik na kini og mga pahayag nga mahimong mag-una sa senator-judges.

“It is about time we admonish him. This is not the first time. Maraming beses na syang sumablay, pumalpak,” matod niya.

“Buti pa sya marami siyang alam, eh itong mga senator-judges mga kasamahan ko there are things na hindi namin alam, nabubulaga na lamang kami kapag nagdakdak sya sa media, kumbaga inuunahan nya tayo, pine-preempt nya tayo,” matod ni Tulfo.

Matod ni Escudero, iyang tun-an ang hangyo ni Tulfo “in advisement.” -Ato ni Bai