Sen. Marcoleta Dili Mangayo og Furlough Aron Mobotar sa Impeachment Threshold ni VP Sara

Miingon si Senator Rodante Marcoleta niadtong Huwebes nga dili siya mangayo og temporaryong kagawasan gikan sa detention aron makaapil sa posibleng pagboto sa Senado bahin sa 16-vote conviction threshold sa impeachment trial ni Vice President Sara Duterte.

“No, I will not move for a furlough just to vote for the threshold,” matod ni Marcoleta sa mga reporter human sa iyang bail hearing atubangan sa Sandiganbayan Third Division.

Ang furlough nagtugot sa usa ka detained nga tawo nga temporaryong makagawas gikan sa kustodiya.

Misamot ang diskusyon bahin sa threshold tungod sa padayong pagkawala sa upat ka senator-judges—lakip si Marcoleta—nga nagpatunghag mga pangutana kon ang Senado isip impeachment court kinahanglan bang mobotar aron ipadayon o usbon ang kasamtangang 16-vote requirement.

Bisan og mipabor si Marcoleta nga ipaagi sa pagboto ang isyu sa threshold, iyang gipasiugda nga dili angay usbon ang gilatid sa Konstitusyon.

“It’s already in the Constitution,” matod ni Marcoleta. “Nobody has a right to change the Constitution.”

Mitumaw ang maong isyu usa ka adlaw human nagtigom ang Senate impeachment court uban sa upat ka retiradong Supreme Court justices nga nagsilbing amici curiae (friends of the court) aron hisgutan ang mga komplikadong isyu sa Konstitusyon bahin sa 16-vote rule. Atol sa hearing niadtong Miyerkules, tulo sa upat ka retiradong justices ang mipahayag nga ang minimum vote requirement aron makombikto dili awtomatikong gitakda sa 16. -Ato ni Bai