Sen. Lacson Nangayo og Klaripikasyon kang Sen. Padilla sa 'Disregard for Law' nga Pahayag

Giawhag ni Senator-Judge Panfilo “Ping” Lacson niadtong Lunes si Senator-Judge Robinhood Padilla nga klarohon kung ang iyang bag-ong pasidaan bahin sa “disregard for the law” gitumong ba sa tibuok impeachment court o sa pipila lamang ka miyembro niini.

Gihimo ni Lacson ang maong pahayag human mipasidaan si Padilla nga posible siyang dili na motambong sa impeachment trial ni Vice President Sara Duterte-Carpio, uban sa iyang mga kaalyado, kung magpadayon ang iyang giingong pagsalikway sa hustong legal nga proseso.

Matod ni Lacson, kung ang pahayag ni Padilla gitumong sa tibuok Senado, diin miyembro usab siya, mahimo kining makadaot sa integridad sa impeachment court.

"I don’t know what Sen. Padilla meant by 'disregard for law' or if he was referring to the entire impeachment court, where he is also a member," matod ni Lacson. "If so, won't his remarks be considered a direct assault on the integrity of the court?"

Dugang ni Lacson, kung pipila lamang ka senador ang gitumong ni Padilla, kinahanglan niyang nganlan sila imbis nga maghimo og kinatibuk-ang mga alegasyon.

"It is only fair that he clarify whether 'disregard for law' refers to the entire impeachment court or just a few members," matod ni Lacson. "If it is the latter, I hope he names them."

Sa usa ka interbyu sa radyo niadtong Domingo, mipasidaan si Padilla nga posible silang dili na motambong sa umaabot nga mga hearing tungod sa wala damhang mga panghitabo sa impeachment trial ug sa giingong sayop nga paghubad sa balaod.

"There may come a point when we will no longer attend," matod ni Padilla.

Gihimo ni Padilla ang maong pasidaan human siya, si Senator Christopher “Bong” Go, ug ang ilang partido nga PDP-Laban mipasaka og petisyon sa Supreme Court aron kuwestiyonon ang desisyon sa Senate impeachment court bahin sa gidaghanon sa mga boto nga gikinahanglan sa paghimo og desisyon. -Ato ni Bai