Sen. Escudero mipahimangno batok personal nga pag-atake sa impeachment trial

Mipahimangno si Impeachment court Presiding Officer Sen. Francis Escudero niadtong Lunes batok sa personal nga pag-atake ug pagpakaubos sa uban atol sa impeachment trial ni Vice President Sara Duterte, ug gipahinumdoman ang mga abogado ug ubang nalambigit nga ang kusog nga panaglalis dili angay makadaot sa dignidad sa proseso.

Gisugdan ni Escudero ang sesyon pinaagi sa pagpahimangno nga magpabiling matinahuron ang tanan, samtang iyang giila nga nagkagamay na ang pasensya ug nagkataas ang tensiyon sulod ug gawas sa korte.

“Our duty is not to conquer one another in these proceedings, but to illuminate the truth and serve the cause of justice,” matod niya.

“Let the arguments be forceful, but never personal. Let the contest be exacting, but never degrading,” dugang niya.

Gipahinumdoman usab ni Escudero ang mga miyembro sa Bar nga ang Code of Professional Responsibility and Accountability nagmando sa mga abogado nga magtinahuray ug magpakita og maayong pamatasan, patas nga pagtratar ug pagkamatinud-anon sa usag usa.

Matod niya, ang maong responsibilidad dili lamang alang sa mga abogado kondili apil usab ang mga partido, saksi, opisyal sa gobyerno, komentarista ug mga tigpaniid sa proseso.

“Disagreement may be vigorous and criticism unsparing, but no cause is strengthened by contempt,” matod ni Escudero.

Gipasiugda niya nga magpabiling nakatutok ang impeachment court sa paghukom sa kaso base sa ebidensiya, hustisya ug pagkapatas bisan pa sa iyang gihulagway nga “rantings or tantrums” gikan sa sulod o gawas sa korte.

Matod ni Escudero, ang proseso dili mahitungod sa bisan kinsang indibidwal nga nalambigit, kondili mahitungod sa nasod, accountability ug patas nga pagpatuman sa hustisya.

Walay gitakdang petsa sa hukom sa Disyembre 16

Giklaro usab sa impeachment court ang mga pahayag sa publiko bahin sa iskedyul sa trial human gipangutana ni Senator-judge Raffy Tulfo ang mga taho nga mahimong ipagawas ang kataposang hukom sa Disyembre 16.

Matod ni Escudero, ang maong mga banabana gibase lamang sa gidaghanon sa mga adlaw sa trial nga gihangyo sa prosecution ug defense ubos sa pre-trial order ug dili kini nagpakita sa aktuwal nga baroganan sa impeachment court.

“It’s based on math, not based on the realities on the ground of the trial,” matod niya.

Mipadayon dayon ang korte sa pagpresentar sa pinansiyal nga ebidensiya, nga gisugdan sa Anti-Money Laundering Council.

Matod ni Escudero, padayon nga dumalahon sa korte ang proseso base sa mga ebidensiyang ipresentar ug sa oras nga gikinahanglan alang sa direct examination, cross-examination ug mga pangutana gikan sa senator-judges. -Ato ni Bai