Sen. Cayetano Nagpasidaan Batok sa Paglapas sa Balaod sa VP Trial

Giawhag ni Senator-judge Alan Peter Cayetano niadtong Lunes ang Senate impeachment court nga hugot nga sundon ang mga panalipod nga gitakda sa balaod sa trial ni Vice President Sara Duterte, ug mipasidaan nga ang pagpangita sa kamatuoran ug pagpanubag dili mahimong rason aron isalikway ang rule of law.

Gipunting ni Cayetano ang maong isyu samtang gitimbang-timbang sa korte ang ebidensya bahin sa financial records ni Duterte, diin iyang gipasiugda nga bisan adunay interes ang publiko sa impeachment proceedings, obligado gihapon ang Senado nga mosunod sa mga limitasyon nga gitakda sa balaod.

Sa iyang pagpakigsulti kang Senate Presiding Officer Francis Escudero, giila ni Cayetano nga adunay politikal ug legal nga bahin ang trial.

“We want the public to know [the truth] as much as possible, and we want to hold impeachable officers accountable. So there are competing values here,” matod sa Minority Leader.

“But this is not the Wild Wild West. Just because we’re curious or want to hold someone accountable doesn’t mean we won’t follow the rules,” dugang niya.

Gipangutana usab ni Cayetano kon hangtod asa mahimong gamiton sa korte ang Anti-Money Laundering Act (AMLA), nga iyang giingong adunay klarong panalipod batok sa political persecution.

“Where is the line? Where is the line between transparency, accountability, and a strict interpretation of the law?” pangutana niya.

Gikutlo ni Cayetano ang mga precedent gikan sa impeachment trials nila former Presidents Joseph Estrada ug Gloria Macapagal-Arroyo, ingon man ni late Chief Justice Renato Corona, ug miingon nga ang nangaging Senate courts kanunay nga mitahod sa klarong mga limitasyon sa balaod.

Iyang gipunting nga atol sa Corona trial, wala ablihi sa Senado ang mga foreign currency account human gikompirma sa Supreme Court ang hugot nga confidentiality niini.

“There was always a common denominator: we stopped, we did not bend the law, and we protected the Constitution. Why? Because that is more important than holding one person accountable,” matod ni Cayetano.

Gitandi niya kini sa testimonya ni Anti-Money Laundering Council (AMLC) Executive Director Atty. Ronel Buenaventura niadtong Lunes, kinsa mihisgot sa mga transaksyon sa dolyar nga wala pa una matino kon adunay legal nga gahum ang korte sa pagsusi niini.

Gipunting usab ni Cayetano ang importanteng kalainan tali sa Corona trial ug sa kasamtangang proceedings bahin sa panahon nga mahimong sakop sa madawat nga ebidensya.

Samtang gitugotan sa Corona court ang pagsusi sa miaging 10 ka tuig aron adunay baseline, nangatarungan si Cayetano nga lahi ang legal nga konteksto sa kasamtangang trial human sa ruling sa Supreme Court sa Duterte v. House of Representatives.

“That’s the prevailing Supreme Court decision. If we disagree, we challenge it. We don’t just declare here that it doesn’t apply—it’s quite clear. How many times do we have to violate the Constitution in this court when it’s very, very clear?” matod ni Cayetano.

Dugang niya, tungod kay anaa na sa prosecution ang mga dokumento nga naglangkob sa kasamtangang termino ni Duterte, dili na kinahanglan nga mangayo pa og mga rekord gikan sa mas unang mga tuig.

Imbis palapdan ang sakop ngadto sa mga ebidensya nga posibleng dili madawat sa korte, giawhag niya ang mga prosecutor nga magtutok sa mga materyal nga hustong sakop sa gahum sa korte.

Gipaambit ni Cayetano nga adunay mga estudyante sa balaod nga nangutana kaniya nganong padayon nga modawat ang Senado og mga ebidensya nga gilalisan ang legal nga basihan.

“The judges have to be able to render a judgment out of fairness based on the law,” matod niya.

“We’re not arguing on the facts or the evidence right now, Mr. President. We’re arguing on the application of the law—what is allowed and what is forbidden.” -Ato ni Bai