Prosecution sa VP Trial Target Mahuman ang Ebidensya sa Katapusan sa Setyembre

Paningkamotan sa prosecution panel sa House of Representatives nga mahuman ang pagpresentar niini sa mga ebidensya sa katapusan sa Setyembre aron matabangan ang Senate impeachment court nga mahuman ang paglitis kang Vice President Sara Z. Duterte sa dili pa ang Disyembre, matod ni House prosecutor ug Bicol Saro Party-list Rep. Terry Ridon niadtong Biyernes.

Sa usa ka online press briefing, miingon si Ridon nga suportado niya ang pahibalo ni Senate President Sherwin Gatchalian nga gilaom nga mahuman ang paglitis sa dili pa ang Disyembre, apan iyang gipasiugda nga “the timetable is a target, not a guarantee.”

Iyang giingon nga ang prosecution, defense ug ang Vice President tanan publikong nanawagan nga paspasan ang pagdesisyon sa kaso.

“We share the same sentiment as the Senate President na hopefully matapos sa pinakamaagang panahon itong paglilitis,” matod ni Ridon.

“We will try to wrap up all of the presentation of evidence hopefully by the end of next month para may pagkakataon iyong defense na mailatag nila iyong kanilang evidence from October up until probably the end or middle of November,” dugang niya.

Nagpresentar karon ang panel og mga ebidensya bahin sa giingong sayop nga paggamit sa confidential funds ug nag-andam kini og mga testigo gikan sa Office of the Vice President (OVP) ug Department of Education (DepEd), ingon man sa National Bureau of Investigation (NBI) ug Philippine Statistics Authority (PSA).

Apil gihapon sa mga articles nga ipresentar sa prosecution ang bribery ug unexplained wealth.

“Hopefully by the end of September, we will be done,” matod ni Ridon.

Naapektuhan ang iskedyul tungod sa daotang panahon nga maoy hinungdan sa pagkansela sa duha ka adlaw nga hearing karong semanaha.

Gisuportahan ni Ridon ang sugyot nga ikonsiderar sa impeachment court ang pagdugang og ikaupat nga adlaw sa trial matag semana o pagpalugway sa adlaw-adlaw nga hearings.

“I think that is something that the Senate Impeachment Court should look into,” matod niya.

Miingon usab siya nga ang mga dokumento nga wala na gilalisan kinahanglan ilakip sa stipulations aron dili na mag-usik og oras sa trial ang mga partido sa pagpamatuod sa mga butang nga ilang gikasabutan na.

Apan iyang gipasiugda nga ang bisan unsang pagpalugway kinahanglan ikonsiderar ang workload ug kapasidad sa mga kawani sa Senado, dili lamang ang kasayon sa mga partido sa kaso, tungod kay ang mas taas nga oras ug dugang nga mga adlaw nagkinahanglan sa mga kawani sa pag-andam sa records, pagdumala sa exhibits, paghimo sa transcripts ug pagsuporta sa korte.

“They will really have to consult with the Senate Secretary at kung kakayanin ba ng mga kawani ng Senado na magkaroon ng ganito ka-extended na mga araw ng pagpasok,” matod ni Ridon.

Miingon siya nga dili diktahan sa prosecution ang iskedyul apan sundon niini ang kahikayan nga aprobahan sa impeachment court ug sa liderato sa Senado sa umaabot nga mga semana.

Matod niya, kontrolahon usab sa prosecution panel ang kaugalingon niini nga pagpresentar pinaagi sa pagrepaso sa mga ebidensya human sa matag testigo.

“We will decide on a week-to-week, day-to-day, witness-per-witness basis kung sapat-sapat na and we can move on to the next article,” matod niya.

“Barring another round of massive rainfall, hopefully wala ng further delays,” matod ni Ridon.

-Ato ni Bai