Prosecution Posibleng Dili Tawgon Sila Lachica, Nolasco Batok Kang VP Duterte

Miingon ang House prosecution team nga posibleng dili nila ipresentar isip mga testigo sila Colonel Raymund Lachica ug Colonel Dennis Nolasco sa impeachment trial ni Vice President Sara Duterte tungod sa mga kabalaka sa ilang kredibilidad.

Miingon si Prosecutor Lorna Kapunan nga dili sayon alang sa prosecution nga mapamatud-an ang mga asoy nila Lachica ug Nolasco, bisan pa nga silang duha nakadawat og bahin sa kapin ₱612.5 million nga confidential funds nga gigahin sa Office of the Vice President (OVP) ug Department of Education (DepEd) sa panahon nga education secretary si Duterte.

Matod ni Kapunan, walay usa sa duha ka military official ang mitestigo sa 2024 inquiry sa House Good Government and Public Accountability Committee bahin sa paggamit sa confidential funds sa OVP ug DepEd.

Miingon siya nga lahi ang kaso ni kanhi OVP special disbursing officer (SDO) Gina Acosta, kinsa mitestigo niadtong Lunes nga iyang gihatag ang ₱500 million nga OVP confidential funds kang Lachica subay sa sugo ni Duterte, bisan giingong supak ang maong paghatag sa 2015 guidelines nga nagdumala sa confidential and intelligence funds.

Gihimo usab ni Acosta ang samang mga pahayag atol sa 2024 House inquiry, busa adunay naunang asoy ang prosecution nga mahimong itandi sa iyang testimonya.

Kanhi nagsilbi si Lachica isip group commander sa Armed Forces of the Philippines Security and Protection Group (ASPG), nga kanhi nailhan nga Vice Presidential Security and Protection Group (VPSPG).

“We will take guidance from the House panel. There probably is wisdom in them not calling the military officials in. Besides, they may not want to incriminate themselves. Baka magsabi sila ng testimony roon na imbento lang,” matod ni Kapunan sa usa ka online press conference niadtong Miyerkules.

“Baka kung anong sabihin nila roon. Even if they are subpoenaed as hostile witness, there may be a concern about their credibility because we cannot cross check their accounts on transcripts of the House panel inquiry,” dugang niya.

Atol sa 2024 House proceedings, mitestigo usab si kanhi DepEd SDO Edward Fajarda nga kanunay niyang gihatag ang tali sa ₱4 million ug ₱6 million gikan sa confidential fund allocation sa DepEd ngadto kang Nolasco subay sa sugo ni Duterte.

Samtang, miingon si House prosecution team impeachment adviser ug kanhi Surigao del Norte Representative Robert Ace Barbers nga gisusi sa mga prosecutor kon ang pagtawag sa usa ka partikular nga testigo makapalig-on ba sa ilang kaso batok kang Duterte.

“The prosecutors will assess the necessity of such and then when there is good reason to, I’m sure we will invite and ask for a subpoena for them,” dugang ni Barbers.