Prosecution nangayo og subpoena kang kanhi Senator Trillanes sa impeachment trial ni VP Sara

Nangayo ang prosecution og subpoena aron mapugos si kanhi Senador Antonio Trillanes IV nga motestigo sa sunod semana sa Senate impeachment trial ni Vice President Sara Duterte bahin sa mga alegasyon nga may kalabotan sa iyang personal nga katigayunan.

Sa pormal nga dokumentong gisumite sa Senado isip impeachment court, gihangyo sa mga prosecutor nga magpagawas og subpoena batok kang Trillanes ubos sa Article II sa Articles of Impeachment. Naglangkob ang Article II sa mga alegasyon bahin sa “unexplained wealth and alleged receipt or acquisition of funds from persons or sources identified in the evidence presented before the impeachment court” ni Duterte.

Una nang miangkon si Trillanes atol sa pagdungog sa House Committee on Justice niadtong Abril nga nakadawat si Duterte ug ang mga miyembro sa iyang suod nga pamilya og ₱181 milyon gikan sa giingong drug lord.

Gihimo ni Trillanes ang maong alegasyon samtang gitimbang-timbang sa mga magbabalaod kung adunay probable cause aron i-impeach ang Vice President.

Kanunay nang gipanghimakak ni Duterte ang mga alegasyon ni Trillanes, lakip ang mga alegasyon bahin sa binilyon ka pesos nga wala ideklarang bank accounts, nga iyang gihulagway nga “incredible.”

Matod usab ni Duterte, sukad pa niadtong 2016, sa dihang milingkod isip presidente ang iyang amahan nga si kanhi Presidente Rodrigo Duterte, gisubli-subli na ni Trillanes ang maong mga alegasyon.

Gipasiugda usab niya nga limpyo ang iyang rekord isip opisyal sa gobyerno ug wala pay pormal nga kaso nga gisang-at batok kaniya may kalabotan sa sayop nga paggamit sa pondo sa gobyerno.

Gawas kang Trillanes, gipahibalo sa prosecution nga mopadayon sa iyang testimonya sa Lunes si PhilGEPS division chief Rendelle Sopeña.

Samtang niini, napadalhan na og subpoena si Davao City Mayor Sebastian Duterte ug posibleng patawagon aron motestigo sa Lunes o Martes.

Gimandoan si Sebastian pinaagi sa subpoena nga magpresentar og mga dokumento nga may kalabotan sa GenCorp Industries, usa ka kompanyang gilista sa mga deklarasyon sa negosyo ni Vice President Duterte.

-Ato ni Bai