Prosecution mohangyo sa impeachment court nga himuong hostile witness si Baste Duterte

Hangyoon sa Prosecution Panel ang Senate impeachment court nga himuong hostile witness si Davao City Mayor Sebastian “Baste” Duterte sa impeachment trial sa iyang igsoon nga si Vice President Sara Duterte.

Gipahayag ni prosecution panel spokesperson Benjamin Tolosa Jr. niadtong Sabado nga pinaagi sa maong hangyo, mas direktang mapangutana sa panel ang manghod nga Duterte samtang gisusi niini ang mga alegasyon bahin sa kabtangan sa Vice President.

Matod ni Tolosa, gustong mahibaloi sa prosecution kung adunay koneksyon tali sa mga kompanyang gideklarar sa Vice President sa iyang Statement of Assets, Liabilities and Net Worth (SALN) ug sa Davao City government.

Gipahibalo sa Senate impeachment court niadtong Miyerkules nga nag-isyu kini og subpoena kang Davao City mayor, nga nagmando kaniya nga motambong isip witness.

Kasamtangang gihisgutan sa korte ang Article II sa Articles of Impeachment, nga may kalabotan sa giingong unexplained wealth sa Vice President.

Matod ni Tolosa, ipangatarungan sa prosecution nga supak sa interes sa panel ang interes ni Baste Duterte, nga gamiton nilang basehan sa paghangyo nga himuon siyang hostile witness.

Gipasabot ni Tolosa nga kung himuon siyang hostile witness, mas adunay kagawasan ang prosecutors sa pagpangutana kaniya, lakip ang paggamit og mas daghang leading questions nga mahimong tubagon diretso og “yes or no.”

Gawas sa manghod nga Duterte, nag-andam usab ang House prosecution panel og pipila ka government officials nga motestigo ubos sa Article II.

Gilauman nga ipasabot sa usa ka assistant commissioner gikan sa Civil Service Commission ang mga lagda ug guidelines sa pag-file sa SALNs, samtang pangutan-on ang usa ka representante gikan sa Securities and Exchange Commission aron mapamatud-an kung adunay financial interests ang Vice President sa pipila ka kompanya.

Gilista usab sa prosecution ang mga representante gikan sa PhilHealth Region XI ug sa bids and awards committee niini aron susihon ang mga transaksyon sa ahensya sa mga kompanyang giingong adunay kalambigitan sa pamilyang Duterte.

Gilauman usab nga mohatag og impormasyon ang usa ka representante gikan sa firearms and explosives office sa Philippine National Police bahin sa mga armas nga nakarehistro sa ngalan ni Vice President Duterte ug sa iyang bana nga si lawyer Manases Carpio.

-Ato ni Bai