Prosecution, gi-withdraw si Edward Fajarda isip testigo sa impeachment trial ni VP Sara

Gi-withdraw sa House prosecution panel niadtong Lunes si kanhi Department of Education (DepEd) special disbursing officer Edward Fajarda isip testigo sa impeachment trial ni Vice President Sara Duterte human gitambagan sa mga doktor nga kinahanglan pa siyang mopahuway og laing 30 ka adlaw tungod sa stroke.

Gipahibalo ni private prosecutor Rey Robles sa Senate impeachment court nga dili na ipadayon sa prosecution ang pagpamatuod ni Fajarda human sa pinakabag-ong medical assessment, nga gikompirma usab sa mga doktor sa Senado.

“In view of the latest medical update and the confirmation by the doctors of the Senate, as a humanitarian consideration, we are going to dispense with the testimony,” matod ni Robles.

Human niini, gimando ni presiding officer Francis “Chiz” Escudero nga i-recall ang subpoena nga una nang gi-isyu kang Fajarda.

“Having withdrawn the request for subpoena for Mr. Edward Fajarda, the presiding officer hereby orders the recall of the subpoena issued to him,” matod ni Escudero.

Miingon si Escudero nga pinaagi sa iyang abogado, nagsumite si Fajarda og sulat ug medical certificate nga nagpakita nga kinahanglan pa siya og laing 30 ka adlaw aron maka-recover gikan sa stroke nga iyang nasinati mga usa ka bulan na ang milabay.

Dugang niya, gipamatud-an ug gikompirma sa Medical and Dental Bureau sa Senado ang medical certification.

Nahimong importante si Fajarda sa presentasyon sa prosecution bahin sa giingong iregular nga paggamit ug liquidation ni Duterte sa confidential funds sa DepEd, diin nagsilbi siyang secretary gikan 2022 hangtod 2024.

Gipaabot unta nga iyang pagpamatuod maglakip sa pagdumala ug turnover sa confidential funds ug acknowledgment receipts nga balik-balik nga nahisgutan atol sa trial.

Human sa pag-withdraw kang Fajarda isip testigo, gihangyo ni House lead prosecutor ug Batangas Rep. Gerville Luistro ang korte nga ipadayon ang presentasyon sa nahibiling mga testigo sa prosecution karong Martes, Setyembre 8.

Miingon si Luistro nga sunod nga mopamatuod sila Police Maj. Jovelyn Magay, lawyer Sunshine Fajarda, ug Commission on Audit employee Bresildo Sabaldan. -Ato ni Bai