Prosecution, defense ni VP Sara naglalis sa confidentiality sa AMLC records

Nagbangga ang prosecution ug defense ni Vice President Sara Duterte tungod sa lalis bahin sa confidentiality sa Anti-Money Laundering Council (AMLC) records atol sa ika-32 nga adlaw sa iyang impeachment trial.

Mitumaw ang isyu samtang nangandam ang prosecution nga ipresentar isip saksi si AMLC Executive Director Ronell Buenaventura. Gihangyo ni Attorney Sheila Sison, lead defense counsel ni Duterte, ang impeachment court nga ibalhin sa Lunes ang testimony ni Buenaventura, tungod kay nagkinahanglan ang defense og dugang nga panahon aron susihon ang daghang records nga ilang nadawat.

Gipahayag usab ni Sison ang iyang kabalaka bahin sa confidentiality provisions nga nagdumala sa AMLC records.

“In addition, of course, to our objection that we may raise on the confidentiality, absolute confidentiality, of these records,” matod ni Sison.

Matod niya, adunay confidentiality markings ang mga summary nga gihatag sa defense ug iyang gihisgutan ang Section 8-A sa Republic Act 11521, o ang amended Anti-Money Laundering Act, nga nagkinahanglan sa AMLC personnel nga protektahan ang impormasyon nga ilang makuha atol sa pagtuman sa ilang mga katungdanan.

Gipangatarungan usab ni Sison nga ang Hulyo nga order sa impeachment court nga nagmando sa AMLC nga isumite ang records wala magpugong sa defense sa pagpahayag og dugang nga mga objection sa paggamit niini.

Gisupak ni House prosecutor Diokno ang posisyon sa defense, ug iyang gipunting nga aduna nay access ang defense sa AMLC documents sukad Setyembre 2.

Gipangatarungan niya nga ang Section 8-A wala nagdili sa paggamit o paghisgot sa records ubos sa valid subpoena nga gi-isyu sa Senate isip impeachment court.

“It does not, and constitutionally cannot, nullify the lawful subpoena powers of the Senate sitting as an impeachment court where compliance with the lawful constitutional subpoena is a justifying circumstance that, if at all, would extinguish any penal liability under Article 11, Paragraph 6 of the Revised Penal Code, for any person acting in obedience to an order issued by a superior or some other lawful purpose,” matod ni Diokno.

“I believe I have said this before, that Section 8-A was only intended to prevent leaks by officers or employees of the Anti-Money Laundering Council. It was never intended as a blanket shield for any lawful subpoenas issued by a proper court,” dugang niya.

Gihisgutan ni Diokno ang mga higayon nga nag-isyu ang Sandiganbayan og subpoena sa AMLC officers nga sa ulahi mipresentar og mga dokumento, ug iyang gipangatarungan nga kinahanglan mahimo usab sa Senate impeachment court ang paggamit sa subpoena powers niini.

Gipabilin usab niya nga dili mahimong mangayo ang defense og reconsideration sa ruling sa impeachment court, tungod kay matod niya, senator-judge lamang ang mahimong mohimo sa maong motion.

Bisan pa sa objection sa prosecution, gitugotan ni impeachment court presiding officer Senator-Judge Francis Escudero ang defense og dugang nga panahon aron repasohon ang records.

-Ato ni Bai