Poa: VP Duterte nagsugo sa pagbalhin sa DepEd confidential funds

Gikompirma ni kanhi Department of Education (DepEd) official ug defense counsel ni Vice President Sara Duterte nga si Michael Wesley Poa niadtong Miyerkules nga gisugo sa Bise Presidente ang pagbalhin sa P112.5 million nga confidential funds sa DepEd ngadto sa chief security officer sa ahensya.

Gihimo ni Poa, isip hostile witness sa prosecution, ang maong pahayag atol sa pagpangutana ni private prosecutor Benjamin Tolosa.

Gipangutana ni Tolosa ang testigo bahin sa testimonya ni kanhi DepEd special disbursement officer (SDO) Edward Fajarda atol sa hearing sa House of Representatives niadtong Nobyembre 2024 kabahin sa giingong sayop nga paggamit sa confidential funds.

Samtang nagbasa gikan sa transcript of stenographic notes, gipahinumdom ni Tolosa nga gipangutana ni House Deputy Speaker Jayjay Suarez sa Quezon si Fajarda kon kinsa ang naghatag og awtoridad nga itugyan ang confidential funds sa DepEd ngadto sa security officer sa departamento, nga sa ulahi giila sa SDO nga si Col. Dennis Nolasco.

“Nung tinanong siya ni Deputy Speaker Jayjay Suarez, sino po ang nagbigay ng pahintulot o ng kapangyarihan para si Col. Nolasco ang mag-disburse ng pera? Ang sagot niya ay, ‘Your Honor, si VP Sara po,’ tama?” pangutana ni Tolosa kang Poa.

Dayon gipangutana sa prosecution counsel ang mga defense lawyer kon kinahanglan pa ba nilang hisgotan sa detalye ang mga pahayag ni Fajarda nga makita sa stenographic notes, diin mitubag si Poa nga dili na kini kinahanglan.

“I remember something to that effect, although I am not sure about the wording, but yes, something to that effect,” tubag ni Poa. “I think the point was made na (that) it was the Vice President who advised him to do so.”

“Hindi advise, instructed him to do so; para precise ho tayo, siya ang nagbigay ng pahintulot o kapangyarihan para si Col. Nolasco po ang mag-disburse ng pera,” giklaro ni Tolosa.

Niining higayona, misupak si chief defense counsel Sheila Sison sa padayong pagpangutana sa iyang kauban sa defense bahin sa testimonya ni Fajarda sa House, ug gipahinumdom ang prosecution nga nangayo na kini og subpoena alang sa kanhi DepEd SDO.

Samtang, gipunting ni Senator-Judge Erwin Tulfo nga ang stenographic notes nga gibasa ni Tolosa nagpakita sa mga pangutana ngadto kang Fajarda ug sa mga pahayag nga gihimo niini.

Gidawat ni presiding officer Senator Francis Escudero ang pagsupak ni Sison, ug miingon, “These questions apply more to him than to Attorney Poa.”

Ang pagkompirma ni Poa nga ang Bise Presidente maoy nagsugo sa pagbalhin sa confidential funds sa DepEd ngadto kang Nolasco susama sa testimonya ni kanhi Office of the Vice President SDO Gina Acosta.

Mitestigo si Acosta nga ang Bise Presidente maoy nagsugo kaniya nga itugyan ang PHP500 million nga confidential funds sa Office of the Vice President ngadto kang Col. Raymund Dante Lachica, nga niadtong panahona commander sa Vice Presidential Security and Protection Group.

-Ato Ni Bai