Pag-audit sa mga Resibo Posibleng Makapapaspas sa Impeachment Trial

Nakapagamay sa mga dokumentong gilalisan sa impeachment trial ni Vice President Sara Z. Duterte ang pagtandi ug pag-audit sa liboan ka acknowledgment receipts, nga posibleng makapapaspas sa Senate impeachment court sa pagsusi sa ebidensya ubos sa Article I.

Miingon niadtong Lunes si impeachment court spokesperson lawyer Regie Tongol nga nakit-an sa Clerk of Court nga 3,616 ka acknowledgment receipts (ARs) ang parehas nga gisumite sa prosecution ug defense, nga nakapagamay sa gidaghanon sa mga dokumentong kinahanglan pang susihon pag-ayo.

“The meticulous comparison has successfully narrowed the evidentiary battleground,” matod ni Tongol atol sa usa ka press briefing.

Sa parehas nga mga dokumento, 2,666 ang may kalabotan sa Office of the Vice President (OVP) ug 950 sa Department of Education.

Ang matag AR nga gisumite sa counsel ni Duterte adunay katugbang nga kopya sa mga gipresentar sa House prosecution.

Miingon si Tongol nga ang pagtino kung unsang mga dokumento ang parehas nga gisumite sa duha ka partido mahimong makalikay sa paggahin sa korte og daghang oras sa balik-balik nga authentication ug makatugot sa senator-judges nga mopadayon sa substantive questioning bahin sa mga resibo.

Apan, nagpabiling gilalisan ang mas gamay nga grupo sa mga dokumento.

Sa 4,492 ka ARs nga gisumite sa prosecution, 876 ang walay katugbang nga kopya gikan sa respondent, nga maoy mga dokumentong mahimong tutokan sa dugang nga pagsusi sa ebidensya.

“Moving forward, the senator-judges can focus their forensic scrutiny specifically on these 876 unmatched documents,” matod ni Tongol.

Migamit usab ang korte og laing pamaagi aron mapaspas ang proseso pinaagi sa pagkuha og judicial notice sa 11 ka opisyal nga rekord sa House of Representatives nga wala kaniadto maapil sa mga hangyo alang sa judicial notice, lakip ang OVP position papers ug mga sulat nga nagpasabot sa mga pagkawala sa congressional hearings.

Gipasabot ni Tongol nga ang pagkuha og judicial notice nag-ila lamang nga anaa ang mga dokumento ug opisyal kining nadawat, apan wala kini magpasabot nga gidawat sa korte nga tinuod o adunay legal nga validity ang sulod niini.

Tungod kay miuyon usab ang defense sa mga dokumento, dili na kinahanglan ang testimonya ni House prosecution witness Marivic Pareja ug gipakanaog siya gikan sa witness stand alas 10:27 sa buntag.

Gisugdan dayon sa House prosecution ang direct examination kang kanhi OVP special disbursing officer Gina Acosta, ang ikaunom nilang saksi alang sa Article I, apan naputol ang pagpangutana tungod sa limitadong oras ug daot nga panahon.