Mga Senator-Judge Mahimong Motambong sa Trial ni VP Sara Gawas sa Session Hall

Gitugotan ang mga senator-judge nga miapil sa impeachment trial ni Vice President Sara Duterte nga mosubay sa proceedings bisan wala sulod sa plenary hall, basta magpabilin sila sulod sa Senate premises, giklaro ni court spokesperson Atty. Reginald Tongol niadtong Miyerkules.

Gipagawas ang maong pahayag human sa pagsaway sa publiko sa litrato nga gi-share ni Senator-judge Robin Padilla, diin makita siya kauban ang mga senator-judge nga sila Mark Villar ug Christopher “Bong” Go nga nagtan-aw sa nagpadayong trial gikan sa Senate lounge imbis nga anaa sa ilang gitakdang mga lingkoranan sulod sa chamber.

Gipasabot ni Tongol nga ang maong pamaagi sakop sa prinsipyo sa continuing quorum. Ubos sa legislative rules, kon ang usa ka mambabalaod nakapamatuod na sa iyang presensya sa plenary, opisyal gihapon siyang ma-record nga present bisan mogawas siya, basta magpabilin siya sulod sa building ug ubos sa awtoridad sa Senate President.

“Nag-aapply diyan ang continuing quorum,” matod ni Tongol atol sa press briefing. “Kapag ang isang legislative person, senator or congressman, ay nakapag-enter na ng kanyang presence sa plenary, kahit lumabas siya diyan, continuing pa rin yung quorum… basta nandoon sila within the control of the Senate President.”

Midugang siya nga sa legislative practice, klarong giila ang hurisdiksyon sa Senate President sa mga antechamber ug kasikbit nga mga lawak, lakip ang senators’ lounge nga tupad mismo sa main hall.

“In legislative practice, that is considered legal because the Senate President has control over the antechambers and all the rooms in the Senate, at yung senators’ lounge, yun naman ay nakatabi lamang sa plenary,” matod ni Tongol.

Nagsugod ang pagsaway sa publiko tungod sa kabalaka kon hingpit ba nga nakatutok ang mga mambabalaod sa maong high-profile proceedings. Sa iyang reaksyon sa isyu, gipasiugda ni House prosecution spokesperson Rep. Zia Alonto Adiong nga ang mga senator-judge angay nga personal nga motan-aw sa trial aron direkta nilang makita ug masusi ang testimonya sa mga testigo.

Gipunting ni Adiong nga ang demeanor ug mannerisms sa usa ka testigo “play a significant part in the determination of either guilt or acquittal” atol sa impeachment trial.

Bisan pa niini, gipadayon ni Tongol nga ang attendance rules sa impeachment trials nahiuyon sa naandang congressional procedures, ug iyang gipunting nga kasagarang mogawas kadiyot ang mga mambabalaod ngadto sa kasikbit nga mga lounge aron mopahulay atol sa regular plenary sessions. -Paraluman News