Mga senador gikuwestiyon ang AFP certification nga gigamit pagsuporta sa paggasto sa DepEd

Gikuwestiyon ni Senator-judges Risa Hontiveros ug Joel Villanueva niadtong Martes ang validity sa Armed Forces of the Philippines (AFP) certification nga gipresentar aron suportahan ang liquidation sa confidential and intelligence funds sa Department of Education (DepEd).

Atol sa impeachment trial ni Vice President Sara Duterte, gipangutana ni Hontiveros si Philippine Army Col. Manaros Boransing II bahin sa certification nga iyang giisyu kalabot sa partisipasyon sa DepEd sa Youth Leadership Summit (YLS) ug Information, Education, and Communication (IEC) activities sa Army.

Miangkon si Boransing atol sa pagpangutana nga walay detalye ang dokumento bahin sa espesipikong kantidad, mga gasto, o tinubdan sa pondo nga makapamatuod kon pila ang gigasto sa DepEd sa mga programa nga gipangulohan sa militar.

“Based on your presentation as a witness, it appears DepEd used your certification as justification for how the department spent its confidential and intelligence funds. But in your certification, did you mention how much DepEd allegedly spent on the Philippine Army’s activities?” pangutana ni Hontiveros.

Giklaro ni Boransing nga ang dokumento nagkumpirma lamang sa partisipasyon sa DepEd—uban sa ubang stakeholders—ug wala kini nag-certify nga migahin ang DepEd og regular, confidential, o intelligence funds alang sa mga kalihokan. Midugang siya nga wala siyay personal nga nahibaw-an kon giunsa paggamit sa departamento ang confidential and intelligence funds niini kalabot sa mga kalihokan.

Gilain usab og pangutana ni Senator-judge Joel Villanueva si Boransing bahin sa gituyo nga sakop sa military certifications nga giisyu ngadto sa mga ahensya sa gobyerno, lakip kon mahimo ba kining lehitimong pamatuod sa confidential expenditure.

“So your exact intention in issuing the certification was merely to confirm that the activities took place?” pangutana ni Villanueva.

Gikumpirma ni Boransing nga ang certification gituyo lamang sa pagpamatuod nga nahitabo ang naandang civil-military operations ug mitambong ang mga ahensyang miapil. Gipasiugda niya nga walay intelligence-gathering activities nga gihimo atol sa youth summits.

Gipamatud-an usab ni Villanueva atol sa pagpangutana nga ang civil-military units direktang gipondohan pinaagi sa regular budget sa Philippine Army, dili pinaagi sa intelligence funds.

-Ato Ni Bai