Mga alias sa confidential funds, gilalisan sa impeachment trial ni VP Sara

Nagpahinabo og bag-ong lalis niadtong Lunes ang paggamit og mga alias sa confidential fund transactions bahin kung kinsa ang adunay burden of proof sa impeachment trial ni Vice President Sara Duterte, sa wala pa nag-break alang sa paniudto ang impeachment court.

Nahimo ang diskusyon human miingon si Senator-judge Raffy Tulfo nga posibleng alias ang pipila sa mga ngalan nga makita sa acknowledgment receipts aron mapanalipdan ang confidential informants, apan iyang gikuwestiyon ang managsamang mga pirma ug handwriting sa nagkalain-laing entries.

Miingon si House private prosecutor Mae Divinagracia nga giisip sa prosecution nga tinuod nga mga tawo ang giingong payees tungod kay wala sukad moingon ang defense sa ilang answer o atol sa pretrial nga mga alias ang gigamit.

“If such was the fact, Your Honor, then the defense should have at the earliest opportunity already indicated that in their answer. But they never did, Your Honor,” matod ni Divinagracia.

Miingon siya nga tungod niini, mipadayon ang prosecution sa ilang baroganan nga tinuod ang mga ngalan sa mga resibo ug nangayo og verification gikan sa Philippine Statistics Authority (PSA).

Gikutlo ni Divinagracia ang articles of impeachment, diin giingong 398 sa 677 ka ngalan nga makita sa Department of Education (DepEd) receipts ug 1,287 sa 1,992 ka ngalan sa Office of the Vice President (OVP) receipts ang wala ma-verify sa civil registry records.

Iyang gipunto nga kung ang defense karon moingon nga mga alias ang maong mga ngalan, kinahanglan unta nga ilang gipahayag kini sa mas sayo pa.

Gisupak ni defense counsel Justin Nicol Dular ang maong argumento, nga nag-ingon nga wala gi-flag sa Commission on Audit ang paggamit og mga alias isip iregularidad, busa walay rason ang defense nga tubagon kini niadtong panahona.

“The fact remains at this point of the proceedings, and even at the time the articles of impeachment was filed, is that the prosecution had the burden of proof to explain and prove every allegation,” matod ni Dular.

“If they are now claiming that these are aliases, the burden is with them. Not with the defense,” dugang niya.

Gipunting ni presiding officer Francis “Chiz” Escudero nga gisalikway sa defense ang mga alegasyon sa impeachment complaint, busa nahimo na kining isyu nga kinahanglan hisgutan sa trial.

Samtang, miingon si Tulfo nga dili siya matingala kung alias ang gigamit tungod kay gigamit usab kini sa law enforcement ug intelligence agencies aron mapanalipdan ang mga informant.

“Makakalusot pa sa akin yung bang gagamit ng alias. Kasi nga naman, syempre, as an informant, especially giving intelligence information or confidential information, siguro allowed sila na gumamit ng alias to protect their identity,” matod ni Tulfo.

Apan miingon siya nga “very questionable” alang kaniya ang makita nga pagkaparehas sa mga pirma ug handwriting sa nagkalain-laing giingong recipients.

“Pero yung bang pirma ng ilang mga informants po doon… pare-pareho. Tapos yung handwriting, yung pag-fill up ng mga pangalan doon, pare-pareho. Ibig sabihin, isang tao lang ang nag-fill up nun,” matod ni Tulfo.

Miingon usab si Tulfo nga kinahanglan ipatawag sa impeachment court sila Col. Raymund Lachica ug Col. Dennis Nolasco aron ipatin-aw kung giunsa pag-andam ang mga ngalan ug acknowledgment receipts sa OVP ug DepEd confidential funds.

“For me, it’s really important na mapatawag dito yung Lachica at saka yung counterpart ng Lachica sa DepEd para sila talaga yung may kinalaman doon sa pagbibigay ng mga pangalan na ’yan,” matod ni Tulfo.

Matod niya, makatabang ang ilang pagpamatuod aron matino kung kinsa gyud ang nag-andam sa mga resibo ug nganong adunay mga entries nga susama ang handwriting ug mga pirma.

Nauna nang gipahibalo sa House prosecution nga ilang tangtangon sila Lachica, Nolasco, ug kanhi Duterte aide Ramil Madriaga gikan sa witness list human ilang giingong igo na ang mga testimonya ug ebidensyang napresentar aron suportahan ang ilang mga alegasyon sa misuse, misappropriation, ug irregular liquidation sa ₱612.5 milyon nga confidential funds.

Nalambigit si Lachica sa pagdumala sa OVP confidential funds human mipamatuod si kanhi special disbursing officer Gina Acosta nga iyang giturn-over ngadto kang Lachica ang upat ka tranche nga tag-₱125 milyon, o kinatibuk-ang ₱500 milyon, sumala sa instruksyon ni Duterte.

Samtang, nalambigit si Nolasco sa DepEd confidential funds human mipamatuod si kanhi special disbursing officer Edward Fajarda atol sa House proceedings nga iyang giturn-over ngadto kang Nolasco ang tulo ka release nga tag-₱37.5 milyon, o kinatibuk-ang ₱112.5 milyon, nga giingong sumala usab sa instruksyon ni Duterte. -Ato ni Bai