Mayor Baste Duterte: Mahibalo Ko Kon Adunay Iregularidad sa mga Kontrata sa Davao City

Mipamatuod niadtong Martes si Davao City Mayor Sebastian “Baste” Duterte nga ang bisan unsang iregularidad sa mga kontrata sa kagamhanang dakbayan—lakip ang mga gihatag sa GenCorp Industries Inc.—makaabot unta sa iyang lamesa, bisan pa og iyang giangkon nga wala niya susiha tagsa-tagsa ang tanang kasabutan.

Mitindog isip saksi si Mayor Duterte sa ika-31 nga adlaw sa impeachment trial ni Vice President Sara Duterte ug gikumpirma atol sa direct examination ni private prosecutor Theodore “Ted” Te nga iyang gitugotan si Assistant City Administrator Atty. Tristan Dwight Domingo nga mopirma sa mga kontrata alang kaniya.

Giklaro ni Mayor Duterte nga dili siya personal nga nahibalo sa matag dokumento nga gipirmahan ni Domingo, apan iyang gipasiugda nga adunay mga pamaagi aron mabantayan ang mga transaksyon.

“If it comes to my table, yes I would be aware. If there is an irregularity, I would be aware of it,” matod ni Duterte. Giila usab niya nga isip mayor sa dakbayan, siya gihapon ang adunay kataposang tulubagon sa mga gipirmahang kasabutan.

Sa wala pa siya mipamatuod, giingnan ni Mayor Duterte ang mga tigbalita nga nakakuha ang GenCorp og kapin ₱34 milyon nga mga kontrata gikan sa kagamhanang dakbayan sa Davao pinaagi sa naandang ug legal nga mga pamaagi. Midugang siya nga wala siya mahibalo niadtong panahona nga adunay bahin sa pagpanag-iya sa kompanya ang iyang igsoon.

Gideklarar ni Vice President Duterte ang iyang mga interes sa negosyo sa GenCorp Industries Inc. diha sa iyang 2024 ug 2025 Statements of Assets, Liabilities, and Net Worth (SALNs). Apan, wala makita ang iyang ngalan sa listahan sa mga shareholders sa corporate filings sa GenCorp sa Securities and Exchange Commission (SEC). -Ato ni Bai