Kanhi Palace exec midangop sa SC nga ipawalay-bisa ang bag-ong impeachment voting rule

Midangop sa Supreme Court si kanhi Executive Secretary Vic Rodriguez aron ipawalay-bisa ang bag-ong pamaagi sa Senate impeachment court sa pagkuwenta sa two-thirds vote nga gikinahanglan aron makonbikto si Vice President Sara Duterte. Matod ni Rodriguez, walay hustong basehan sa Konstitusyon ang pag-usab sa maong voting requirement.

Sa iyang 24 ka pahinang petisyon nga gisang-at sa Supreme Court, gihangyo ni Rodriguez nga ipawalay-bisa ang desisyon sa impeachment court niadtong Setyembre 23. Nangayo usab siya og temporary restraining order (TRO) aron mapahunong ang pagpatuman sa desisyon samtang girepaso pa sa Supreme Court ang iyang petisyon.

Naggikan ang petisyon sa desisyon sa impeachment court nga balihon ang ruling ni Presiding Officer Sen. Francis “Chiz” Escudero niadtong Hulyo 6. Ubos sa maong ruling, gikinahanglan ang 16 ka boto, o two-thirds sa tanang 24 ka miyembro sa Senado, aron makonbikto ang usa ka opisyal.

Ubos sa bag-ong pamaagi nga giaprobahan sa Senado, ang probisyon sa Konstitusyon nga “all members of the Senate” maglakip lamang sa mga senador nga legal ug aktuwal nga makahimo sa pag-apil sa panahon sa botohan. Tungod niini, mahimong dili iapil sa kinatibuk-ang ihap ang mga senador nga napriso, dili makahimo sa ilang katungdanan tungod sa medikal nga kondisyon, dili maabot sa legal nga awtoridad sa Senado, o adunay ubang hinungdan nga dili makaapil.

Gipasiugda ni Rodriguez nga walay awtoridad ang impeachment court ubos sa Konstitusyon sa pag-usab sa kinatibuk-ang ihap sa mga senador nga gamiton sa pagkuwenta sa two-thirds vote requirement.

“This is not merely a change in procedure. It changes the operative constitutional threshold for conviction,” sumala sa petisyon. “In essence, the Tribunal has added a qualification to the constitutional phrase: ‘all Members of the Senate’. The Constitution itself contains no such qualification.”

Sa iyang petisyon, gihangyo ni Rodriguez ang Supreme Court nga:

Ipawalay-bisa ang ruling niadtong Setyembre 23, 2026, sa bahin nga nagtugot sa pagkunhod sa kinatibuk-ang ihap sa mga senador nga basihan sa botohan pinaagi sa dili pag-apil sa mga senador nga wala mitambong o wala miapil.

Kumpirmahon nga ang Article XI, Section 3(6) sa 1987 Constitution, nga nagkinahanglan sa pagsugot sa two-thirds sa tanang miyembro sa Senado aron makonbikto ang usa ka opisyal, maglakip sa tanang 24 ka senador.

Ideklarar nga dili mahimong gamiton sa Senado ang kaugalingong mga lagda sa proseso aron usbon ang kinatibuk-ang ihap sa mga senador nga basihan sa botohan sumala sa Konstitusyon.

Ibalik ang ruling ni Escudero niadtong Hulyo 6 nga nagtino nga 16 ka boto ang gikinahanglan aron makonbikto ang usa ka opisyal.

Gipasiugda ni Rodriguez nga adunay 24 ka miyembro ang Senado ug nga ang pagkawala o dili pag-apil sa usa ka senador sa botohan wala magpasabot nga dili na siya miyembro niini.

Misugod ang lalis bahin sa ihap sa mga senador nga basihan sa botohan tungod sa dugay nang pagkawala sa upat ka senador sa impeachment proceedings.

Nagpabiling napriso sa Quezon City Jail sila Sen. Jinggoy Estrada ug Sen. Rodante Marcoleta tungod sa mga kasong plunder. Si Sen. Loren Legarda anaa sa France alang sa dugay nga medical leave, samtang wala mitambong si Sen. Ronald “Bato” dela Rosa human magpagawas ang International Criminal Court og warrant of arrest batok kaniya may kalabotan sa kampanya batok sa ilegal nga droga sa administrasyong Duterte.

Giaprobahan sa Senate impeachment court ang ruling niadtong Setyembre 23 pinaagi sa 13–1 nga botohan, samtang unom ka senator-judges ang wala miapil sa botohan.

Gipasiugda sa impeachment court nga wala mausab ang two-thirds vote requirement. Matod niini, giklaro lamang sa desisyon kung kinsa sa mga senador ang iapil sa kinatibuk-ang ihap nga basihan sa botohan kon adunay mga miyembro nga legal o pisikal nga dili makahimo sa pagtuman sa ilang katungdanan isip mga huwes.

-Ato ni Bai