Kanhi Opisyal sa DepEd Mihangyo nga Dili Motambong sa Impeachment Trial ni VP Duterte Human giingong Na-stroke

Mihangyo ang kanhi special disbursing officer sa Department of Education (DepEd) nga si Edward Fajarda nga tugotan siyang dili motambong sa impeachment trial ni Vice President Sara Duterte karong semanaha human giingong na-stroke, matod ni Senate impeachment court presiding officer Francis Escudero niadtong Lunes.

Sa ika-17 nga adlaw sa trial, giingon ni Escudero nga nakadawat ang impeachment court og sulat ug medical certificate gikan sa abogado ni Fajarda nga naghangyo nga tugotan siyang dili motambong sa mga hearing gikan Agosto 24 hangtod 26.

“According to the letter and medical certificate, Mr. Fajarda was confined in the ICU for observation, although he’s in the regular room now, because he suffered from a stroke on the lower back side of the brain,” matod ni Escudero.

Una nang gipadalhan og subpoena sa impeachment court si Fajarda aron motestigo bahin sa Article 1 sa Articles of Impeachment, nga naglakip sa giingong sayop nga paggamit sa P612.5 milyon nga confidential funds—P500 milyon gikan sa Office of the Vice President ug P112.5 milyon gikan sa DepEd.

Gimandoan ni Escudero ang pangulo sa Senate Medical and Dental Bureau nga susihon si Fajarda, kumpirmahon ang iyang kahimtang sa iyang mga doktor, ug mosumite og report sa dili pa desisyunan sa korte ang iyang hangyo.

Human niini, mihangyo si House lead prosecutor ug Batangas 2nd District Rep. Gerville Luistro sa impeachment court og certified true copy sa medical certificate ni Fajarda.

“Nonetheless, Your Honor, we would like to express our complete understanding and concern should the medical condition have any relation to the ongoing impeachment trial,” matod ni Luistro.

Mihangyo usab si Luistro nga magpabilin si Fajarda sa listahan sa mga testigo sa prosecution, ug temporaryong gitakda ang iyang testimonya sa Septiyembre 7.

-Ato Ni Bai