Impeachment trial ni VP Sara tibuok adlaw sa 11 ka hearing sa Oktubre

Magpahigayon ang Senate impeachment court og 11 ka tibuok-adlaw nga hearing sa Oktubre alang sa impeachment trial ni Vice President Sara Duterte, sa dili pa kini temporaryong hunongon aron hatagan og panahon ang deliberasyon sa gisugyot nga 2027 national budget.

Gipahibalo ni presiding officer Francis “Chiz” Escudero niadtong Martes ang iskedyul sa korte hangtod Nobyembre samtang gipaningkamotan sa mga senador nga mahatagan og panahon ang impeachment trial, regular nga trabaho sa Senado, ug pagrepaso sa budget sa sunod tuig.

Karong Setyembre, kasagarang ipahigayon ang impeachment proceedings sa buntag hangtod alas 2:30 sa hapon, samtang magsugod alas 3 sa hapon ang regular Senate sessions. Dungan usab niini ang mga budget hearing.

Una nang gikasabutan sa Senado nga kasagarang ipahigayon ang impeachment trial matag Lunes hangtod Miyerkules, samtang ang Huwebes ug Biyernes igahin alang sa tibuok-adlaw nga budget hearings.

Mas taas ang oras sa trial sa Oktubre, diin tibuok adlaw nga maglingkod ang impeachment court sa Oktubre 1 ug 2, Oktubre 5 hangtod 9, ug Oktubre 12 hangtod 15—mokabat sa 11 ka adlaw nga hearing.

Matod ni Escudero, pinaagi niini mas taas nga oras ang mahatag sa korte sa trial sa dili pa ipunting sa mga senador ang ilang panahon sa national budget.

“Trial shall be suspended to give way for the budget deliberations and hearings in preparation of the Senate version of the budget,” matod niya.

Walay impeachment trial nga ipahigayon gikan Oktubre 16 hangtod Nobyembre 8 samtang gihuman sa Senate Committee on Finance ang budget hearings.

Sugod Nobyembre 9, gilauman nga hisgutan sa mga senador sa plenaryo sulod sa mga duha ka semana ang gisugyot nga General Appropriations Act. Tungod niini, posibleng molungtad hangtod Nobyembre 18 ang paghunong sa impeachment trial.

“We are still trying to squeeze in a trial date in those two weeks, at least one, but I’m not sure yet. So, most likely, the trial will be suspended until Nov. 18,” matod ni Escudero.

Posibleng ipadayon sa impeachment court ang regular nga proceedings sa Nobyembre 19 o 20, o sa mosunod nga semana, depende sa dagan sa budget deliberations.

Mahimo pa usab nga mausab ang iskedyul tungod sa mga procedural ug constitutional issues nga kinahanglan hisgutan sa korte gawas sa regular nga pagpaminaw sa mga testigo.

Gigahin na sa korte ang Setyembre 16 aron paminawon ang amici curiae, o mga legal expert, bahin sa gilalisan nga voting threshold nga gikinahanglan aron ma-convict si Duterte. Ang Setyembre 23 gigahin usab alang sa oral arguments sa prosecution ug defense ug posibleng pagboto sa maong isyu.

Temporaryo usab nga gihunong ang trial karong semanaha aron mahatagan og panahon ang duha ka kampo sa pagmarka sa kapin 1,800 ka bank, insurance, ug ubang financial documents sa dili pa ipresentar sa prosecution ang unexplained wealth case niini.

Gipulihan sa bag-ong iskedyul ang unang tentative arrangements samtang gipaningkamotan sa mga senador nga mapadayon ang impeachment case nga dili makompromiso ang pagrepaso sa gisugyot nga PHP7.2-trillion nga 2027 national budget.

-Ato Ni Bai