Impeachment court misalikway sa hangyo nga dili patestigohon ang AMLC chief

Gisalikway sa Senate impeachment court niadtong Lunes ang hangyo sa defense panel nga dili patestigohon ang pangulo sa Anti-Money Laundering Council (AMLC) sa impeachment trial ni Vice President Sara Z. Duterte, ug mipasabot nga ang confidentiality rules dili makapugong sa legal nga pagpakuha sa mga rekord.

Gisalikway ni Presiding Officer Francis Escudero ang motion nga dili patestigohon si AMLC Executive Director Ronel Buenaventura, apan gitugotan ang defense nga padayong mosupak sa pipila ka bahin atol sa iyang testimonya.

“The AMLC witness may therefore identify, authenticate and explain the reports specified in the subpoena,” matod ni Escudero.

Giklaro niya nga ang maong hukom wala magtugot sa walay limitasyong pagbutyag sa impormasyon ngadto sa publiko ug mahimong kutob lamang sa may kalabotan nga mga butang ang testimonya o himuon kini in camera kon gikinahanglan.

Gipangatarungan sa defense nga ang Section 8-A sa Anti-Money Laundering Act nagmando sa AMLC ug sa secretariat niini nga panalipdan ang impormasyon nga ilang nadawat o giproseso ug nagdili sa dili awtorisadong pagbutyag niini.

Gipahimangnoan niini nga ang pagtugot kang Buenaventura nga motestigo mahimong makalapas sa confidentiality rules ug mahimong precedent nga makaapekto sa pinansiyal nga mga rekord sa ubang opisyal sa gobyerno ug pribadong mga tawo.

Apan matod ni Escudero, ang balaod nagtakda lamang sa paagi ug mga kondisyon sa pagbutyag sa impormasyon ug wala kini magmando og “absolute silence under every circumstance.”

Matod niya, gipanalipdan sa confidentiality provision ang impormasyon sa AMLC batok sa leaks, walay pili nga pagmantala ug dili awtorisadong pagbutyag, apan wala kini magdili sa pagtuman sa legal ug espesipikong subpoena nga adunay mga panalipod.

Gikutlo usab sa korte ang Bank Secrecy Law, nga klarong nagtugot sa pagsusi sa mga deposito sa bangko sa impeachment cases, bisan pa og gipunting ni Escudero nga dili kini awtomatikong makasulbad sa laing confidentiality rules nga nagdumala sa impormasyon sa AMLC.

Sa wala pa ang hukom, gisultihan ni Buenaventura ang korte nga mitambong ang AMLC isip pagtuman sa mga subpoena nga giisyu sa impeachment court ug sa internal rules niini bahin sa pagpaambit sa impormasyon.

Matod niya, giila sa AMLC ang awtoridad sa korte ug nagtuman lamang kini sa legal nga compulsory process.

Sa ulahi, nangayo si Senator-judge Pia Cayetano og sinulat nga kopya sa hukom ug panahon aron tun-an ang pangatarungan niini, samtang giparekord ni Senator-judge Joel Villanueva ang iyang baroganan nga bisan importante nga polisiya ang bank secrecy, wala kini mahimong absolute sa impeachment proceedings.

Human niini, miingon ang defense nga tumanon niini ang hukom apan ipabilin ang katungod nga mosupak sa espesipikong mga bahin sa testimonya ni Buenaventura ug maghimo og cross-examination “ad cautela,” o isip pag-amping.

Gitugotan dayon ni Escudero ang prosecution nga mopadayon sa direct examination sa AMLC chief. -Ato ni Bai