House prosecution dili na ipatawag ang 15 ka nahibiling testigo sa Article 1

Dili na ipatawag sa House prosecution panel ang nahibiling 15 ka testigo niini alang sa unang article of impeachment batok kang Vice President Sara Duterte, human kini miingon nga igo na ang mga ebidensyang napresentar aron pamatud-an ang giingong sayop nga paggamit sa confidential funds.

Gipahibalo ni private prosecutor Lorna Kapunan ang maong desisyon sa ika-23 nga adlaw sa impeachment trial niadtong Martes. Matod niya, 27 ka testigo unta ang ilang ipresentar alang sa Article 1, apan 10 na ang nakatestigo samtang duha pa ang nasakop sa stipulation.

“To date, we have already presented 10 witnesses and stipulated as to the testimony of two witnesses—a total of 12 witnesses out of 27,” matod ni Kapunan.

Human sa taas nga miting sa prosecution nga nagsugod sa miaging gabii ug milungtad hangtod Martes sa buntag, nagkasabot ang public ug private prosecutors nga dili na ipadayon ang testimony sa nahibiling mga testigo, lakip ang mga nakatakdang motestigo niadtong adlawa.

“After a long meeting last night and towards this morning, just before this hearing, the prosecution… decided to forego, Your Honors, not only with the witnesses subpoenaed for today, but with all the remaining 15 witnesses,” matod ni Kapunan sa korte.

Lakip sa dili na ipatawag mao sila Police Major Jovelyn Magay, kanhi Department of Education Assistant Secretary Sunshine Fajarda, ug Commission on Audit Assistant Commissioner Bresilio Sabaldan.

Matod ni Kapunan, bisan og plano unta sa prosecution nga magpresentar og liboan ka exhibits uban sa tanang testigo, igo na alang sa ilang kaso ang 4,750 ka dokumentong nailhan pinaagi sa unang 12 ka testigo.

“Not a conclusion of fact and law, but a conclusion based on 4,750 documents presented and identified by the 12 witnesses—10 of whom were present in court and subjected themselves to long cross-examinations by the defense counsels, as well as questions from the senator-judges,” matod ni Kapunan.

“The testimony elicited very clearly a pattern, as one would see a chessboard,” dugang niya.

Human mapresentar ang kinauyokan sa Article 1, gipahibalo sa prosecution nga mahimo nilang hangyoon sa ulahi nga motestigo mismo si Duterte, uban sa usa ka legal expert gikan sa gawas, human nila mahuman ang pagpresentar sa tanang upat ka articles of impeachment.

“To summarize, there will be no more hearings [or] trials on Article 1 on the misuse and misappropriations of confidential funds,” matod ni Kapunan.

Apan gipahimangnoan ni Senate President ug Presiding Officer Francis “Chiz” Escudero ang prosecution nga dili pa pormal nga tapuson ang ilang presentasyon sa Article 1 hangtod matino sa korte kon aduna pa bay dugang nga testimony nga kinahanglan.

Tungod niini, mihunong na sa pagkakaron ang pagpresentar sa prosecution sa mga ebidensya bahin sa confidential funds human sa 12 ka testigo ug dul-an sa 4,800 ka dokumento nga napresentar isip ebidensya.

-Ato Ni Bai