House Archives Official Gipakanaog sa Witness Stand

Gipakanaog sa Senate impeachment court gikan sa witness stand ang usa ka opisyal sa archives service sa House of Representatives human miuyon ang defense sa pagka-authentic sa mga dokumentong iya untang pamatud-an atol sa impeachment trial ni Vice President Sara Duterte niadtong Lunes.

Gipakanaog ni Senate impeachment court presiding officer Francis “Chiz” Escudero si Marivic Pareja gikan sa witness stand 20 minutos human siya nanumpa.

Si Pareja usa ka 27 ka tuig nang empleyado sa House ug walo ka tuig nang director sa House Legislative Archives and Museum Management Service.

Gipresentar ni House prosecutor ug Cagayan de Oro 1st District Rep. Lordan Suan ang mga rekord sa House nga gitipigan sa House archives service kalabot sa mga hearing sa House Committee on Good Government and Public Accountability gikan Setyembre hangtod Disyembre 2024.

Lakip sa mga dokumento ang mga sulat gikan kang Duterte ug pipila ka opisyal sa Office of the Vice President (OVP) ngadto sa House committee, position papers nga gisumite sa mga empleyado sa OVP, mga sulat nga naglambigit kang kanhi OVP special disbursing officer Gina Acosta ug ubang mga opisyal, ug mga dokumento nga may kalabotan sa Commission on Audit.

Gikumpirma ni defense lawyer Lindon Miguel Bacquel, “Your Honor, we confirm our stipulation as to the documents mentioned by the prosecution, that these documents are transmitted to the Archives and the Archives are the custodian of these documents.”

Ang maong service mao ang opisyal nga tipiganan sa House alang sa legislative records. Katungdanan niini ang pagpreserbar, pagpangita ug pagpagawas sa certified copies sa House records, ingon man ang pag-isyu sa katugbang nga certifications.