Gina Acosta: ₱500M nga Confidential Funds Gihatag kang Col. Lachica

Mipamatuod niadtong Lunes si kanhi Office of the Vice President (OVP) special disbursing officer Gina Acosta nga iyang gitunol kang Colonel Raymund Lachica ang kinatibuk-ang ₱500 milyon nga confidential funds niadtong 2022 ug 2023, subay sa direktang sugo ni Vice President Sara Duterte.

Atol sa direct examination ni private prosecutor Amando Ligutan, gikumpirma pag-usab ni Acosta ang iyang naunang testimonya atubangan sa usa ka House panel, diin iyang giingon nga gisugo siya ni Duterte nga itunol kang Lachica ang ₱125 milyon nga confidential funds tungod sa iyang kasinatian sa pagdumala sa confidential operations.

“Yung sagot ninyo was because po may utos po ni Ma’am Inday Sara na sa kanya po i-release kasi siya po ang nakakaalam kung paano po i-implement ang mga programs and activities in line po sa confidential activities. You confirm that?” pangutana ni Ligutan.

“Yes, Your Honor. Siya [Lachica] lang ‘yung may alam on how to implement ’yung confidential activities,” tubag ni Acosta.

Gikumpirma usab ni Acosta nga iyang gitunol kang Lachica ang nahibiling ₱375 milyon nga confidential fund allocation sa OVP alang sa 2023 ubos sa samang pamaagi.

Apan, gikuwestiyon ni Senate impeachment court presiding officer Francis Escudero ang maong testimonya, ilabina kung gitugotan ba gyud sa nagdumalang guidelines ang usa ka security officer nga modisburse o modumala sa confidential funds.

Sa dihang gipangutana, giangkon ni Acosta nga ang Joint Circular 2015-01 wala maghatag og katungdanan sa pagdisburse sa pondo ngadto sa usa ka security officer.

“Hindi po [trabaho iyon ng security officer], Your Honor. Trabaho po ’yan ng…disbursing officer, Your Honor. Pero, pag na-release ko na po ang pera sa kanya, Your Honor, pinareceive ko sa kanya, Your Honor, magbigay po siya sa akin ng utilization report,” pasabot ni Acosta.

Gipangutana dayon ni Ligutan si Acosta nganong iyang gitunol ang kuwarta bisan kabalo siyang ang Joint Circular nagtakda nga ang maong responsibilidad para lamang sa special disbursing officer. Gipasabot ni Acosta nga ang opisyal nga katungdanan ni Lachica sulod sa OVP mao ang iyang pangunang basihan.

“Hindi ko ibibigay kung hindi siya [Lachica] ang designated security officer [ng OVP],” matod niya.

Agig tubag, gisugyot ni Ligutan nga posibleng misunod lamang si Acosta kang Lachica tungod kay dili niya mahimong supakon ang direktang sugo ni Vice President Duterte.