Gatchalian Nakabantay og ‘Talagsaong’ ₱2.7B nga Transaksyon nga Nalambigit kang VP Sara

Gipunting ni Senate President Sherwin Gatchalian niadtong Miyerkules ang iyang gihulagway nga “unusual” nga pagdaghan sa mga transaksyon sa kuwarta nga nalambigit kang Vice President Sara Duterte, nga mikabat sa ₱2.7 bilyon gikan 2009 hangtod 2013.

Gipahayag ni Gatchalian ang iyang mga kabalaka atol sa impeachment trial sa Senado samtang nangutana kang Anti-Money Laundering Council (AMLC) Secretariat Executive Director Ronel Buenaventura, nga mipresentar og taho sa pinansiyal nga mga transaksyon sa Bise Presidente.

Matod ni Gatchalian, ang ₱2.7 bilyon nga mga transaksyon sulod sa lima ka tuig naglangkob sa mga 70% hangtod 80% sa kinatibuk-ang ₱3.3 bilyon nga natala ubos sa ngalan ni Duterte sa AMLC gikan 2007 hangtod 2025.

“Tinitingnan ko itong report ninyo, at may nakita akong pattern dito, from 2009 to 2013, ang transactions reported by VP Sara ay, for that time frame alone, was about P2.7 billion. Lumalabas parang those transactions were almost 70 to 80 percent of the total P3.3 billion (for 2007 to 2025),” matod ni Gatchalian ngadto sa saksi sa prosekusyon.

Sa paghisgot sa mga kantidad matag tuig, gipunting ni Gatchalian nga mikabat sa mga ₱700 milyon ang mga transaksyon niadtong 2009, ₱600 milyon niadtong 2010, ug ₱500 milyon niadtong 2011.

“It’s an unusual trend. Compared to the others na on average P40 million lang ang transactions, ito it’s about P2.7 billion in a span of five years,” dugang niya.

Gipangutana dayon sa Senate President ang pangulo sa AMLC kung angay pa bang imbestigahan sa ahensiya ang maong mga kantidad bisan dugay na kining nahitabo.

“In your opinion, is this something AMLC should look at despite, alam ko matagal na siya?” pangutana ni Gatchalian.

Mitubag si Buenaventura nga importante gihapon ang karaang mga rekord sa pinansiyal nga imbestigasyon, ilabina sa pagsusi kung adunay kalit nga pagtaas sa mga transaksyon.

“Your Honor, generally, yung historical transactions, tinitingnan naman po. Part ng tinitingnan kung nagkaroon ng biglaang laki ng transaction, kasama po yun sa analysis namin in general,” matod ni Buenaventura.

Pagdaghan sa mga Suspicious Transaction Reports

Gipunting usab ni Gatchalian ang 34 ka Suspicious Transaction Reports (STRs) nga nalambigit kang Duterte, nga gisumite sa mga bangko ug ubang institusyon ngadto sa AMLC.

Matod niya, 30 sa 34 ka mga taho, o mga 80% sa kinatibuk-ang STRs ni Duterte, natala sulod lamang sa tulo ka tuig gikan 2022 hangtod 2025.

“Bakit nasa tatlong taon lang out of the entire 18-year period (2007 to 2025)? Bakit nandun ang bulto ng STRs?” pangutana sa Senate President.

“Yan po ang lumabas sa record namin,” tubag ni Buenaventura.

Gipakita sa taho sa AMLC nga ang 30 ka STRs nga nalambigit kang Duterte naglangkob sa mga transaksyon nga mikabat sa ₱60.9 milyon. Dugang niini, natala usab ang 28 ka STRs nga nalambigit sa iyang bana nga si Manases Carpio, nga adunay mga transaksyon nga nagkantidad og ₱373.5 milyon.

-Ato ni Bai