DepEd posibleng migasto og kaugalingong pondo sa youth training activities — Army official

Mitestigo niadtong Martes ang usa ka Army officer nga posibleng migasto ang Department of Education (DepEd) og kaugalingong pondo alang sa youth training activities niadtong 2023, apan dili niya matino kon gikan ba kini sa confidential funds sa ahensya.

Gisultihan ni Philippine Army (PA) Col. Manaros Boransing II ang Senate impeachment court nga walay nadawat nga pondo gikan sa DepEd ang iyang unit alang sa Youth Leadership Summit (YLS) ug Information Education Communication (IEC) activities nga gihimo gikan Enero hangtod Disyembre 2023.

Niadtong panahona, si Boransing ang assistant chief of staff for civil-military operations sa First Infantry (Tabak) Division, diin iyang gidumala ug gibantayan ang duha ka kalihokan nga gihulagway sa prosecution isip anti-communist recruitment initiatives. Gipangulohan ni Vice President Sara Duterte ang DepEd niadtong panahona.

Gitinguha ni Presiding Officer ug Sen. Francis Escudero nga matin-aw kon posibleng ang DepEd mismo ang migasto alang sa kaugalingong personnel niini nga miapil sa mga kalihokan, bisan pa sa unang pahayag sa Army witness nga walay pondong gibalhin ngadto sa iyang unit.

“Binaggit nyo po kanina na wala kayong tinaggap na pera mula sa DepEd, wala ring bingay na pera ang DepEd sa AFP o sa First Tabak o sa unit ninyo? But would you know if DepEd spent on that activity on their own people because you collaborated with Deped on that activity? Would you know? Sabi nya kanina kasi KKB (kanya-kanyang bayad) e,” pangutana ni Escudero atol sa impeachment trial ni Duterte.

Miingon si Boransing nga nahibaw-an niyang adunay DepEd personnel nga mitambong sa youth summits, apan dili siya makatubag kon giunsa pagpondo ang ilang mga gasto.

“Yes sir. What I know is they arrived there. They were there during the youth leadership summits and traveling as I know in the government entails expenses and permission to leave the post,” matod ni Boransing.

Gipangutana dayon ni Escudero kon gigamit ba sa DepEd ang confidential funds alang sa mga kalihokan. Miingon si Boransing nga wala siyay impormasyon bahin sa tinubdan sa bisan unsang gigasto sa DepEd.

Gipangutana pag-usab sa presiding officer kon, bisan walay pondong gibalhin ngadto sa AFP o sa mga unit niini, migasto ba ang DepEd mismo alang sa mga kalihokan.

“So you can confirm that no money was given to the AFP or any of its units or anyone in your unit but that DepEd must have spent on the activities?” pangutana pag-usab ni Escudero.

Gibalik ni Boransing nga walay nadawat nga pondo gikan sa DepEd ang iyang unit.

“But it is very possible that DepEd spent on the YLS and the IECs?” dugang pangutana ni Escudero.

Gipasabot usab ni Boransing nga ang mga gasto sa Army alang sa YLS ug IEC activities gikan sa regular budget niini. Apan miingon siya nga ang YLS kabahin sa mas halapad nga kampanya nga naglakip sa civil-military, combat ug intelligence operations.

“Although I can’t comment about the intelligence operations, Sir, but they are interlink and mutually supporting so all army and AFP operations are intelligence-driven, Sir,” dugang niya.

Miuyon usab si Boransing sa dihang gipataas ni Escudero ang posibilidad nga ang Armed Forces of the Philippines (AFP) mahimong migamit og intelligence funds alang sa YLS ug IEC activities.

Gibutyag usab sa testigo nga mipirma siya og certification, human sa hangyo sa DepEd, nga nagkumpirma sa partisipasyon sa ahensya sa youth summits.

Apan gisultihan ni Boransing ang impeachment court nga wala siya masayod nga ang certification mahimong gamiton sa DepEd sa ulahi aron suportahan o hatagan og katarungan ang paggamit niini sa confidential funds.

-Ato Ni Bai