Defense team ni VP Duterte walay isyu sa pagtangtang kang Trillanes isip saksi

Gitahod sa defense team ni Vice President Sara Duterte ang desisyon sa prosecution nga tangtangon si kanhi senator Antonio Trillanes IV isip saksi sa iyang impeachment trial, matod sa kampo niadtong Huwebes.

Matod ni Michael Poa, spokesperson sa defense team ni Duterte, andam gihapon unta sila sa pagtubag sa testimony ni kanhi senator Trillanes kon gipadayon sa prosecution ang pagpresentar kaniya atubangan sa Senate impeachment court.

“Sa amin naman po, we were really prepared with the list of witnesses that they gave initially. So kami po, naghanda po kung sino ang naka-assign,” matod niya atol sa press briefing human sa ika-32 nga adlaw sa impeachment trial.

Gipasabot ni Poa nga tahoron usab sa defense ang bisan unsang desisyon sa prosecution nga tangtangon ang ubang mga saksi kon nagtuo kini nga makatabang ang maong lakang sa ilang strategy.

“If they think na better for their strategy to drop a witness, whoever it may be, not specifically [former] senator Trillanes, but whoever it may be, we will continue to respect that,” matod niya.

Sa ulahi, giklaro ni Trillanes nga iyang gihangyo ang House prosecution panel nga tangtangon siya gikan sa listahan sa mga saksi. Nahitabo kini human gipahibalo ni House lead prosecutor Gerville Luistro nga dili na ipresentar sa prosecution ang kanhi senator.

Maghimo na lamang si Trillanes, usa ka lantip nga kritiko sa pamilyang Duterte, og press briefing sa Biyernes, Oktubre 2, samtang hisgutan sa impeachment court ang mga alegasyon kalabot sa unexplained wealth ni Duterte.

Samtang, gibalhin sa Senate impeachment court ngadto sa Lunes, Oktubre 5, ang sunod nga trial session human tugoti ang hangyo sa defense alang sa dugang nga panahon sa pagpangandam alang sa direct examination sa prosecution kang Anti-Money Laundering Council Executive Director Ronel Buenaventura.

Matod ni Poa, nagkinahanglan ang defense og dugang nga panahon aron repasohon ang mga materyales kalabot sa testimony ni Buenaventura, ug iyang gipunting nga Huwebes sa buntag lamang nila nadawat ang summary.

-Ato ni Bai