Bata nga namatay niadtong 1965, nalista nga nakadawat sa OVP confidential funds — PSA

Mipamatuod ang usa ka opisyal sa Philippine Statistics Authority (PSA) niadtong Lunes nga usa ka masuso nga namatay niadtong 1965 apil sa pipila ka mga patay na ug gagmayng bata nga nalista nga nakadawat sa confidential funds ni Vice President Sara Duterte niadtong 2023.

Sa iyang pagpamatuod sa ika-22 nga adlaw sa Senate impeachment trial ni Duterte, miingon si PSA Assistant National Statistician Marizza B. Grande nga ang ngalan nga “Marlin Sunga,” nga makita sa acknowledgment receipt sa Office of the Vice President (OVP), adunay katugbang sa civil registry records nga usa ka masuso nga namatay niadtong Nobyembre 2, 1965.

Sa pagpangutana ni prosecution counsel Atty. Mae Divinagracia, gikompirma ni Grande nga 58 ka tuig nang patay si Sunga sa dihang giingong nahitabo ang transaksyon niadtong 2023.

Nakaplagan sa PSA ang kinatibuk-ang 37 ka ngalan sa OVP acknowledgment receipts nga adunay katugbang sa records sa mga tawo nga namatay na pipila ka tuig sa wala pa ang nakadokumentong mga transaksyon.

Lakip sa mga ngalan sa mga patay nga gihisgutan sa korte mao sila Fortunato Salig, nga nalista nga nakadawat og ₱200,000 niadtong Agosto 2, 2023 apan namatay niadtong Hunyo 29, 2011; Rodolfo P. Traya, nga nalista nga nakadawat og ₱120,000 niadtong Marso 5, 2023 apan namatay niadtong Mayo 4, 2021; ug Emilio Sagan, nga nalista nga nakadawat og ₱70,000 niadtong 2023 apan namatay niadtong Hulyo 28, 2015.

Mipamatuod usab si Grande nga pipila sa mga ngalan sa mga resibo adunay katugbang nga buhing mga menor de edad nga gagmay pa kaayo aron katuohan nga sila mismo ang nakadawat sa maong pondo.

Si Miko Alquizar, nga nalista nga nakadawat og ₱400,000 niadtong Marso 2023, adunay katugbang nga usa ka 1-anyos nga natawo niadtong 2022. Si Beatrice Cuenca, nga nalista nga nakadawat og ₱400,000, adunay katugbang usab nga 1-anyos nga natawo niadtong 2022. Si Mikay delos Reyes, nga nalista nga nakadawat og ₱200,000 niadtong Marso 2023, adunay katugbang nga 6-anyos nga natawo niadtong 2020.

Ang findings sa PSA midugang sa naunang mga alegasyon bahin sa pagka-authentic sa OVP liquidation documents nga gisumite ngadto sa Commission on Audit (COA). Nauna nang nasuta ang audit records tungod sa mga kuwestiyonableng ngalan sama nila “Mary Grace Piattos,” “Ralph Josh Bacon,” “Antonio Pagong,” “Timon Andrew Pusa,” ug “Xuniso Belat.”

Ang gikuwestiyon nga acknowledgment receipts may kalabotan sa liquidation sa OVP sa ₱125 milyon nga confidential funds nga gigasto sulod sa 11 ka adlaw gikan Disyembre 21 hangtod 31, 2022—o aberids nga kapin ₱11.36 milyon kada adlaw.

Gipaabot nga pormal nga isumite sa prosecution ang findings sa PSA isip importanteng documentary evidence sa nagpadayong impeachment trial kalabot sa giingong sayop nga paggamit ni Duterte sa public funds. -Ato ni Bai