Walay Nakitang Problema si Marcos sa Posibilidad nga si Escudero ang Mupangulo sa Impeachment Trial ni VP Sara

Miingon si Presidente Ferdinand Marcos Jr. nga wala siyay nakitang problema sa posibilidad nga si Senador Francis “Chiz” Escudero ang mahimong presiding officer sa umaabot nga impeachment trial ni Bise Presidente Sara Duterte.

Gisalikway ni Marcos ang mga kritisismo nga may kalabotan sa papel ni Escudero sa impeachment proceedings niadtong miaging tuig nga wala madayon.

Miingon ang presidente nga opinyon lamang ang mga negatibong panan-aw batok kang Escudero ug dili kini sukdanan sa iyang kapasidad sa pagpangulo sa husay.

“Those are opinions. I don’t think that reflects in any way on how he will do (Opinyon lamang kana. Sa akong tan-aw, wala kana magpakita kung unsaon niya pagdumala ang maong tahas),” matod ni Marcos sa usa ka interbyu sa Russia.

Gipahinumdoman usab ni Marcos nga ang mga patakaran sa impeachment proceedings nga giaprobahan sa Senado mao gihapon ang mga patakaran nga gisulat ni Escudero atol sa pagdumala sa miaging impeachment complaint.

“As a matter of fact, the rules that were adopted by the Senate were the rules that Senator Chiz wrote during the last year’s, when they were handling the last year’s impeachment complaint (Sa pagkatinuod, ang mga lagda nga gigamit ug giaprobahan sa Senado mao gihapon ang mga lagda nga gihimo ni Senador Chiz atol sa pagdumala sa impeachment complaint sa miaging tuig),” dugang niya.

Mipahayag si Marcos nga wala siyay pagduhaduha sa abilidad ni Escudero sa pagdumala sa impeachment trial

“So, in terms of his ability to be able to run the trial, I don’t think that’s in doubt (Busa, kung ang iyang abilidad sa pagdumala sa husay ang hisgutan, wala ko magduha-duha niini),” matod pa niya.

Giklaro usab sa presidente nga ang paghunong sa impeachment proceedings niadtong miaging tuig dili tungod sa mga aksyon ni Escudero kondili tungod sa desisyon sa Korte Suprema.

“If you remember, the reason that the impeachment trial last year came to stop was because of the Supreme Court decision. And that had nothing to do with Senator Chiz (Kung inyong mahinumdoman, nahunong ang impeachment trial sa miaging tuig tungod sa desisyon sa Korte Suprema. Wala kana’y kalabotan kang Senador Chiz),” matod ni Marcos.

Midugang siya nga iyang tahuron bisan kinsa ang pilion sa Senado isip presiding officer, basta husto, legal, ug uyon sa Konstitusyon ang proseso sa pagpili.

“I will support whomever the Senate chooses. As long as the process that they undertook in making the choice is proper, is legal, is constitutional, then that’s fine with me (Suportahan nako bisan kinsa ang pilion sa Senado. Basta husto, legal, ug uyon sa Konstitusyon ang ilang gisunod nga proseso sa pagpili, wala kana’y problema alang kanako), matod sa presidente.

Mipahayag usab si Marcos nga naglaum siya nga ang bag-ong liderato sa Senado makatabang sa pagpasig-uli sa kahapsay ug makapamenos sa kagubot sulod sa kamara.

“I will definitely do whatever I can to work together with the legislature, the Senate in particular, to make sure that things go smoothly and that we move away from the chaos that we have been seeing in the Senate. And I hope the new reorganization will achieve that (Buhaton nako ang tanan nga akong mahimo aron makigtambayayong sa lehislatura, ilabina sa Senado, aron masiguro nga hapsay ang dagan sa mga buluhaton ug malikayan ang kagubot nga atong nasaksihan sa Senado. Naglaum usab ko nga makatabang niini ang bag-ong reorganisasyon),” matod niya.

Gikatakda sa Senado ang pormal nga pagpili sa presiding officer alang sa impeachment trial sa Hulyo 6.

Miingon kaniadto si Senador Panfilo “Ping” Lacson nga nagkasabot na ang bag-ong mayoryang bloke sa Senado nga suportahan si Escudero alang sa maong papel.

-Ato ni Bai