VP Sara Duterte andam makigtambayayong sa IBP-Misamis Oriental

Gipahayag pag-usab ni Vice President Sara Duterte nga andam ang iyang opisina nga makigtambayayong sa Integrated Bar of the Philippines (IBP) Misamis Oriental Chapter aron makahatag og legal ug social assistance sa mga Pilipinong nanginahanglan.

Gipaambit ni Duterte ang mga detalye sa ilang panagkita pinaagi sa Facebook post niadtong Huwebes, diin iyang gihisgutan ang iyang courtesy call sa opisina sa chapter sa Cagayan de Oro City niaging bulan.

Atol sa pagbisita, nakigkita ang Vice President sa local bar members aron hisgutan ang posibleng hiniusang mga programa tali sa Office of the Vice President (OVP) ug sa legal association nga makatabang sa local communities.

Sa iyang pakigpulong ngadto sa iyang mga kaubang abogado, gipasiugda ni Duterte ang responsibilidad sa legal profession sa pagpanalipod sa civil liberties ug pagmintinar sa pagsalig sa publiko.

“Tandaan natin palagi, bilang mga abogado, kaakibat ng ating tungkulin ang pagsulong at pagprotekta sa karapatang pantao ng lahat. Patuloy tayong manindigan sa tama at magserbisyo para sa mga Pilipino,” matod ni Duterte.

(“Let us always remember that as lawyers, it is our duty to promote and protect the human rights of all. Let us continue to stand for what is right and serve the Filipino people.”)

Giawhag niya ang legal community nga magpabiling lig-on sa public service ug pagtuman sa rule of law.

Nahitabo ang panagkita samtang nag-atubang si Duterte sa nagpadayong impeachment trial sa Senate, human gi-adopt sa House of Representatives ang articles of impeachment batok kaniya.

Sa pagtapos sa iyang post, gisubli ni Duterte ang iyang panawagan alang sa panaghiusa ug paghigugma sa nasod: “Mahalin natin ang Pilipinas—para sa Diyos, sa Bayan, at sa bawat Pamilyang Pilipino.” (“Let us love the Philippines—for God, for the Nation, and for every Filipino Family.”)

-Ato ni Bai