VP Duterte, milimod nga nakadawat og kwarta gikan sa kanhing security officer

Milimod si Vice President Sara Duterte nga nakadawat siya og kwarta gikan kang Rodulfo Gracioso Jr. Matod niya, naghulat pa ang iyang mga abogado sa opisyal nga kopya sa affidavit ni Gracioso gikan sa National Bureau of Investigation (NBI) sa dili pa sila mosang-at og kaso batok kaniya.

Sa usa ka pahayag, giingon ni Duterte nga wala siya makaila kang Gracioso ug wala gayod siya makadawat og kwarta gikan kaniya. Si Gracioso usa ka kanhing police officer nga nagsilbi kaniadto isip security officer ni kanhi House Speaker Lord Allan Velasco.

“My lawyers are awaiting an official copy of the Gracioso affidavit from the National Bureau of Investigation (NBI) so they can begin working on the cases to be filed against him,” matod niya.

Gisalikway usab ni Duterte ang testimonya ni Gracioso isip mga bakak. Matod niya, iyang ipakontra sa iyang mga abogado ang mga alegasyon ni Gracioso sa higayon nga makuha nila ang affidavit.

“Once we are done dismantling the lies contained in his testimony, it will end up in the trash bin—just like the one from Ramil Madriaga,” dugang niya.

Gihulagway ni Duterte ang maong isyu nga “nothing more than another media stunt,” ug giakusahan ang administrasyon nga naningkamot sa pagbuhi pag-usab sa impeachment case batok kaniya nga matod niya, nagkahuyang na.

“The desperation of the administration to bring me down, push for Charter Change, prevent the 2028 elections, and cling to power is becoming increasingly diabolical,” matod niya.

Giawhag usab sa Bise Presidente si President Ferdinand Marcos Jr. nga mopailalom sa publikong drug test ug motubag bahin sa flood control scandal.

Dugang niya, ang politikal nga mga maniobra, propaganda ug ang iyang gihulagway nga tinuyo nga mga paglingla aron mabalhin ang atensiyon sa publiko dili makapahilom sa katawhang Pilipino.

Giimbestigahan sa NBI ang mga alegasyon ni Gracioso nga, ubos sa mando ni Velasco, naghatod siya og mga maleta nga puno sa kwarta ngadto kang Vice President Sara Duterte, kanhi President Rodrigo Duterte ug Davao City 1st District Representative Paolo “Pulong” Duterte.

Giangkon ni Gracioso nga mikabat sa kapin P2 billion ang kinatibuk-ang kwarta nga iyang gihatod kang Vice President Duterte. Giangkon usab niya nga naghatod siya og kwarta ngadto kang kanhi President Rodrigo Duterte sa Malacañang gikan sa 2018 hangtod 2022, ingon man og usa ka maleta nga adunay P100 million ngadto kang Pulong Duterte.

-Ato ni Bai