Villar nagpasiugda sa Geriatric Center Act aron palig-onon ang serbisyo alang sa mga katiguwangan

Maabiabihong gidawat ni Senador Mark Villar, isip nangunang awtor ug kaabag nga sponsor sa gitanyag nga Philippine Geriatric Center Act, ang kalamboan sa maong panukala human sa gihimong interpellations sa Senado niadtong Disyembre.

Sa usa ka pahayag sa balita, giingon ni Mark Villar nga ang maong balaod anaa na sa ikaduhang ug ikatulong pagbasa, nga magbukas sa mas lapad nga akses sa espesyal nga serbisyong panglawas alang sa mga senior citizens sa Pilipinas.

“The focus of this bill has always been to ease the burdens of our seniors and their families (Ang pokus sa maong balaod mao ang pagpagaan sa kabug-aton sa atong mga senior citizens ug sa ilang mga pamilya),” matod sa senador. 

“As our population ages, we must ensure they receive dignified, comprehensive care that addresses their unique needs. This legislation will significantly improve access to geriatric services, reduce the strain on families providing care, and promote healthier, more independent lives for our elderly (Samtang nagkatigulang ang atong populasyon, kinahanglan masiguro nga ang mga katiguwangan makadawat og dungganon ug komprehensibong pag-atiman nga motubag sa ilang mga panginahanglan. Kini nga balaod magpalapad sa akses sa geriatric services, makapamenos sa kabug-aton sa mga pamilyang nag-atiman, ug makapauswag sa mas himsog ug mas independente nga kinabuhi sa atong mga katiguwangan),” dugang niya.

Ang maong balaod nagtumong sa pagtukod sa Philippine Geriatric Center, usa ka national tertiary specialty hospital ubos sa Department of Health (DOH) nga magsilbing pangunang pasilidad sa nasud alang sa geriatric medicine, research, ug training.

Gimandato usab niini ang koordinasyon sa tibuok nasud tali sa DOH, mga lokal nga yunit sa kagamhanan (LGUs), ug uban pang mga hingtungdan aron mapalig-on ug mapalapad ang hiniusang serbisyo sa panglawas sa tibuok nasud.

Gawas sa pagtukod sa Philippine Geriatric Center, ang mga mahinungdanong probisyon sa maong balaod naglakip sa:

• pagpahigayon og koordinasyon sa tibuok nasud alang sa pagpalapad sa mga serbisyo sa panglawas para sa mga tigulang;

• pagbansay sa mga kawani sa panglawas (healthcare workers) sa geriatrics ug mga sakit nga may kalabutan sa pagkatigulang; ug

• pagpalambo sa komprehensibong programa nga naglakip sa mga preventive services, rehabilitation, ug multidisciplinary treatment alang sa mga senior citizens.

  
  

Kung mapasa ug mapatuman, giingon ni Mark Villar nga ang maong balaod makatabang sa mga katiguwangan nga makadawat og espesyal nga medikal nga atensyon sa mas ubos nga gasto, ug magpasiugda sa pagpanalipod ug paghatag bili sa nagkatigulang nga populasyon sa nasud.

Giawhag usab niya ang iyang mga kaubang senador nga suportahan ang paspas nga pag-aprobar sa maong balaod, tungod kay “ang pagpamuhunan sa geriatric care usa ka pagpamuhunan sa kaayohan sa mga pamilyang Pilipino ug sa kaugmaon sa nasud.”

-Paraluman News