US peace envoys, unang mibisita sa Kyiv aron iduso ang kalinaw sa Ukraine

Nakigkita niadtong Domingo sila US peace envoys Jared Kushner ug Steve Witkoff kang Ukrainian President Volodymyr Zelenskiy sa Kyiv samtang gipakusog pag-usab sa Trump administration ang paningkamot niini nga tapuson ang upat ug tunga ka tuig nga gubat sa Russia sa Ukraine.

Mibiyahe sila Kushner ug Witkoff gikan sa Moscow, diin nakighinabi sila sulod sa tulo ka oras kang Russian President Vladimir Putin niadtong Sabado, apan walay timailhan nga nakab-ot nila ang dakong kalamboan aron masulbad ang panagbangi.

Gamay ra ang resulta sa nangaging mga panaghisgot alang sa kalinaw nga gipataliwad-an sa US ug gidasig ni President Donald Trump, kinsa nangampanya uban sa saad nga dali niyang tapuson ang gubat. Niadtong Biyernes, mipasabot siya nga adunay bag-ong proposal ang US, apan wala siya mohatag og dugang detalye.

Gihulagway ni Putin nga “highly useful” ang panagtagbo niadtong Sabado, samtang usa ka opisyal sa White House ang misulti sa Reuters nga ipahibalo sa umaabot nga mga semana ang sunod nga mga lakang.

Nakigkita ang duha ka envoy kang Zelenskiy ug uban pang taas nga opisyal sa Ukraine sa sentro sa Kyiv.

Nagtuo si Zelenskiy nga dakong papel ang Washington sa bisan unsang kasabutan alang sa kalinaw. Matod niya, adunay kahigayonan nga makab-ot ang kalinaw sa dili pa magsugod ang US sa pagtutok sa sunod nga presidential elections niini sa sunod tuig.

Sa usa ka post sa social media sa wala pa moabot ang mga envoy, matod ni Zelenskiy nga nakigpulong na siya sa iyang negotiating team isip pagpangandam ug gusto sa Ukraine nga matapos ang gubat.

“Security guarantees are needed. A dignified post-war peace is needed. Our proposals have been drawn up,” matod niya.

Usa ka tinubdan nga adunay kahibalo sa maong butang ang misulti sa Reuters nga atua usab sa Kyiv niadtong Domingo ang national security advisers sa Britain, France ug Germany. Wala giklaro sa tinubdan kung unsang mga panagtagbo ang ilang apilan.

MAAMPINGONG PAGLAOM SA MGA RESIDENTE SA KYIV

Makadaghang higayon nang mibisita sila Witkoff ug Kushner, nga umagad ni Trump, sa Moscow isip mga envoy alang sa kalinaw. Apan ang pagbisita niadtong Domingo mao ang ilang unang pag-adto sa Kyiv isip mga negosyador sa US.

Dugay nang gihangyo sa mga lider sa Ukraine ang ilang pagbisita, ug sa mga kadalanan sa Kyiv, nga grabeng gibombahan sa miaging mga semana, adunay pipila ka residenteng naglaom nga adunay maayong resulta ang maong paningkamot.

“The issue can be solved in the blink of an eye. We want peace. I’ve fought myself, so I know what war is like. We need peace, because there’s no other way,” matod ni military veteran Stepan Yermak.

Nagpabiling dako ang kalainan sa baruganan sa duha ka habig sa daghang importanteng isyu sa nangaging mga panaghisgot, lakip ang kaugmaon sa Donbas region sa sidlakang Ukraine. Gipangayo sa Russia nga mobiya ang Ukraine sa mga lungsod nga kontrolado pa niini didto, apan nagdumili ang Kyiv tungod kay nagtuo kini nga mahimo pa nilang depensahan ang maong mga lugar sulod sa daghang tuig.

Importante alang sa Ukraine ang lig-on nga garantiya sa seguridad gikan sa mga kaalyado niini sa Europe ug US aron mapugngan ang Russia sa pagsulong pag-usab.

“We need an agreement that will never be broken,” matod ni Svitlana Kurylenko, usa ka 19-anyos nga trabahante sa cafe.

“Just leave Ukraine alone and let people live in peace.”

TEMPORARYONG PAGHUNONG SA MGA PAG-ATAKE

Bisan halos walay kausaban sa mga linya sa panagsangka sa gubat sa yuta, gipakusog sa pwersa sa Russia ug Ukraine ang ilang mga pag-atake gikan sa layo pinaagi sa kahanginan sa miaging mga semana.

Gibombahan sa Russia ang kapital sa Ukraine adlaw ug gabii gamit ang mga missile ug drone sulod sa miaging duha ka semana, lakip ang pag-atake niadtong Biyernes sa headquarters sa SBU security service.

Matod sa Kremlin, temporaryo nilang hunongon ang mga pag-atake sa Kyiv hangtod Lunes, samtang matod ni Zelenskiy, hunongon usab sa Ukraine ang mga pag-atake sa Moscow.

Apan wala mohunong ang panagsangka sa 1,200-kilometro (750-milya) nga linya sa gubat, ug gibombahan sa Russia ang ubang mga siyudad sa Ukraine niadtong Sabado.

Nakapahinabo ang Ukraine og dakong kadaot sa mga refinery, oil terminal ug mga bodega sa online retailer nga Wildberries sa Russia sa tibuok ting-init, isip paningkamot nga mas mapamahal alang sa Moscow ang pagpadayon sa gubat.

Matod sa Ukraine niadtong Domingo, giatake niini sa miaging gabii ang Ryazan oil refinery, nga nahimutang mga 480 kilometro (300 milya) sulod sa Russia, nga maoy hinungdan sa sunog. -Ato ni Bai