US Judge Nagdili sa Trump Admin nga Gamiton ang Kuwarta sa Katawhan sa Political Ads

Gidid-an sa usa ka huwes sa US niadtong Domingo ang administrasyon ni President Donald Trump nga mogamit sa kuwarta sa mga magbubuhis aron bayran ang mga political advertisement, human gisibya sa telebisyon sukad sa ulahing bahin sa Setyembre ang mga advertisement nga nagdayeg kang Trump ug nakapukaw og pagsaway gikan sa duha ka dagkong partido.

Temporaryong gipahunong ni US District Judge Jennifer Rochon, nga nakabase sa Manhattan, ang mga advertisement human mipasaka og kaso ang mga reklamante, lakip ang watchdog group nga Common Cause.

Matod sa mga reklamante, ang mga advertisement usa ka propaganda sa politika nga gitumong sa pagtabang sa mga kandidato sa Republican Party sa midterm elections sa Nobyembre 3, ug dili mga pahibalo alang sa publiko.

Nagplano na daan ang administrasyon ni Trump nga hunongon ang pagsibya sa mga advertisement bisan sa wala pa mogawas ang mando ni Rochon, sumala sa laing pahayag nga gisumite sa korte niadtong Sabado.

Ang desisyon miabot human sa pipila ka adlaw nga kontrobersiya bahin sa mga advertisement nga gibayran gamit ang kuwarta sa mga magbubuhis ug gisibya sa kataposang mga semana sa wala pa ang midterm elections.

“We won’t stop until this administration is held fully accountable, and no president from any party can waste and abuse taxpayer funds for propaganda ever again," matod ni Common Cause President ug CEO Virginia Kase Solomón.

Miingon si Trump niadtong Lunes nga giisip niya ang mga advertisement isip "positive promotion for our great U.S.A." apan dili na kini pondohan sa kuwarta sa mga magbubuhis. Gipahibalo usab sa White House karong semanaha nga ang political action committee ni Trump nga MAGA PAC na ang mogasto sa mga advertisement sa umaabot.

Matod sa White House, dili bayran sa political action committee ni Trump ang kuwarta sa mga magbubuhis nga nagasto na sa mga advertisement nga nasibya. Sa kataposan sa mga advertisement, adunay pahibalo nga ang gobyerno sa US maoy nagbayad niini. Wala dayong mitubag ang Justice Department sa hangyo alang sa komentaryo bahin sa mando sa huwes.

Ang mga reklamante, nga naglakip usab sa usa ka unyon sa mga empleyado sa gobyerno ug usa ka kandidato pagka-state representative sa Alabama, mihangyo kang Rochon nga temporaryong ipahunong ang mga advertisement hangtod Biyernes aron dili na kini masibya sa mga programa sa hinapos sa semana sama sa mga duwa sa football ug Saturday Night Live.

Gikuwestiyon usab sa mga opisyal sa Democratic Party ang mga advertisement pinaagi sa laing kaso nga ilang gipasaka sa federal court sa Washington. -Ato ni Bai