Trump Nag-awhag sa mga Suporter nga Mobotar Pinaagi sa Koreyo

Giawhag ni President Donald Trump ang iyang mga suporter niadtong Sabado ug usab niadtong Lunes nga mobotar pinaagi sa koreyo kon gusto nila, usa ka kausaban sa tono sa US president nga sulod sa daghang tuig naghulagway sa mail-in voting isip pamaagi nga daghan kunog pagpanglimbong.

Namulong sa mga reporter sa White House sa wala pa mobiya alang sa usa ka rally sa Nebraska niadtong Lunes sa hapon, miingon si Trump nga mahimong mobotar pinaagi sa koreyo ang iyang mga suporter sa umaabot nga congressional midterm elections sa Nobyembre 3, bisan pa nga mas gusto niya ang personal nga pagbotar.

“They can vote by mail if they want, because we seem to have no choice because a lot of people want to vote by mail, but a lot of very good people also want to vote in-person,” matod ni Trump. “You can do either.”

Gihimo niya ang maong pahayag human siya nag-post og campaign video niadtong weekend nga nag-awhag sa mga Republican nga mobotar.

“Vote early, vote by mail or vote in-person on Election Day, November 3rd,” matod ni Trump.

Wala dayon maklaro nganong nausab ang tono ni Trump. Balik-balik nga naghimo ang presidente og bakak nga mga pahayag nga ang iyang kapildihan sa 2020 election resulta sa pagpanglimbong sa eleksyon, lakip ang mail-in ballots. Gisulayan sa Trump administration nga hugtan pag-ayo ang mga lagda sa mail-in voting sa wala pa ang midterm elections, apan niadtong Setyembre wala tugoti sa Supreme Court ang Postal Service nga ipatuman ang bag-ong mga lagda.

Nagpahayag kaniadto ang pipila ka Republican og kabalaka nga ang pagpugong sa mail-in voting mahimong makapakunhod sa gidaghanon sa mga konserbatibong botante sa mga kabaryohan nga mobotar. Importante silang bahin sa mga suporter ni Trump, ug ang pipila kanila nagpuyo nga medyo layo sa mga presinto sa botohan.

Misulod ang mga Republican sa kataposang mga semana sa kampanya taliwala sa lisod nga kahimtang sa politika sa tibuok nasod. Nakaplagan sa Reuters/Ipsos poll nga nahuman niadtong Lunes nga 32% ang approval rating ni Trump, nga nagpabilin sa record low niini niadtong Setyembre. Sa pangutana kon unsang partido ang ilang suportahan sa midterms, 44% sa mga rehistradong botante mipili sa Democrats kumpara sa 37% sa Republicans. Sa mga independent, nanguna ang Democrats sa 37% kumpara sa 21%, samtang 28% ang wala pa makadesisyon. -Ato ni Bai