Trump midangop sa US Supreme Court alang sa kaso batok kang Hillary Clinton kalabot sa 2016 election

Mihangyo si US President Donald Trump sa US Supreme Court niadtong Biyernes nga ibalik ang iyang gibasura nga kaso batok sa iyang Democratic rival sa 2016 election nga si Hillary Clinton, nga iyang giakusahan nga nakigkunsabo sa kanhing FBI Director nga si James Comey ug uban pa aron manipulahon ang maong eleksiyon pinaagi sa pagdugtong sa iyang kampanya sa Russia.

Gisumite sa Republican president ang iyang apela human gibasura sa usa ka federal judge ang kaso ug gipahamtangan si Trump ug usa sa iyang mga abogado og dul-an sa $1 milyon nga sanctions tungod sa pagpasaka og "frivolous" nga kaso. Human niini, gipaboran sa US appeals court ang pagbasura sa kaso ug ang gipahamtang nga sanctions.

Gipahayag sa mga abogado ni Trump sa ilang apela nga gikinahanglan ang pagrepaso sa Supreme Court sa maong kaso aron mapanalipdan ang pagkapresidente. Matod nila, ang mga desisyon sa ubos nga mga korte nagpakita sa "a deeply troubling trend of federal courts using sanctions and disciplinary threats to punish the president and his lawyers for legitimate legal positions that those courts (erroneously) reject."

Niadtong 2022, sa dihang wala na siya sa katungdanan human mapildi sa 2020 election, gikiha ni Trump si Clinton, Comey, kanhing British intelligence officer Christopher Steele, ang Democratic National Committee, ug daghan pang uban pinaagi sa usa ka taas nga reklamo nga gisumite sa federal court sa Florida.

Si Trump, nga adunay kasaysayan sa pagkiha sa iyang mga kaatbang, miingon nga sa wala pa ang 2016 election, nakigkunsabo si Clinton sa iyang mga kaalyado aron daoton ang iyang reputasyon pinaagi sa usa ka "false narrative" nga siya ug ang iyang kampanya nakigkunsabo sa Russia. Ang taas nga kaso naglakip sa mga alegasyon sa "racketeering" ug "conspiracy to commit injurious falsehood," lakip sa uban pang mga akusasyon.

Gipildi ni Trump si Clinton sa maong eleksiyon bisan pa nga napildi siya sa national popular vote, ug nagsilbi sa iyang unang termino isip presidente gikan 2017 hangtod 2021.

Giakusahan sa mga opisyal sa gobyerno sa US ang Russia nga nanghilabot sa 2016 election, samtang ang imbestigasyon nga gipangulohan ni kanhing FBI chief Robert Mueller nakadokumento sa daghang kontak tali sa mga miyembro sa kampanya ni Trump ug mga operatiba sa Russia nga naningkamot sa pag-impluwensiya sa eleksiyon pabor kaniya. Gitawag ni Trump nga "hoax" ang alegasyon sa pagpanghilabot sa Russia.

Sukad sa iyang kapildihan kang Democrat Joe Biden niadtong 2020, nagpadayon si Trump sa pagpakaylap og bakak nga mga pag-angkon bahin sa kaylap nga pagpanglimbong sa botohan sa maong eleksiyon. Nakabalik si Trump sa pagkapresidente human mapildi si Democrat Kamala Harris niadtong 2024, ug nagpadayon siya sa pagpakaylap sa maong bakak nga mga pag-angkon.

'POLITICAL MANIFESTO'

Gibasura ni US District Judge Donald Middlebrooks ang kaso ni Trump batok kang Clinton tungod sa daghang kakulangan niini, lakip ang dugay nga pagpasaka ni Trump sa pipila ka iyang mga reklamo. Gitandi sa huwes ang kaso ni Trump sa usa ka "two-hundred-page political manifesto outlining his grievances against those that have opposed him."

Sa ulahi, gimando ni Middlebrooks si Trump ug ang iyang pangunang abogado sa kaso nga si Alina Habba nga mobayad og dul-an sa $1 milyon nga bayronon ug gasto. Gipahamtang ang sanctions tungod sa pagpasaka og kaso nga matod sa huwes, gituyo "to dishonestly advance a political narrative." Gisaway usab sa huwes si Trump ug ang iyang mga abogado tungod sa "continuing pattern of misuse of the courts."

Nakaplagan ni Middlebrooks nga ang kaso naggamit og abusadong mga pamaagi sa paglitigar, adunay "knowingly false" nga mga alegasyon sa kamatuoran, ug nagpresentar og "frivolous" nga mga legal nga argumento.

Gipaboran sa 11th US Circuit Court of Appeals nga nakabase sa Atlanta ang mga desisyon sa huwes niadtong 2025, lakip ang gipahamtang nga sanctions.

"Many of Trump's and Habba's legal arguments were indeed frivolous," sumala sa 11th Circuit.

Sa dokumentong gisumite niadtong Biyernes, miingon ang mga abogado nila Trump ug Habba nga ang gitakdang panahon sa pagpasaka sa kaso angay untang gipalugway tungod kay gipili ni Trump nga dili una magkiha atol sa iyang unang termino aron matuman ang iyang mga responsibilidad isip presidente ubos sa Konstitusyon.

"This court's intervention is necessary to protect the presidency, and to prevent judicial disagreement from becoming a license to punish its advocates," sumala sa dokumento.

Nagpagawas si Mueller og taho niadtong 2019 bahin sa iyang imbestigasyon isip special counsel nga gitudlo sa Justice Department. Gipahayag sa taho nga ang Russia "interfered in the 2016 presidential election in sweeping and systematic fashion," apan gipatin-aw usab nga "the investigation did not establish that members of the Trump campaign conspired or coordinated with the Russian government in its election interference activities."

Matod ni Mueller sa iyang taho, nakakaplag siya og "numerous links" ug nga ang kampanya ni Trump "expected it would benefit" gikan sa paningkamot sa Russia nga maimpluwensiyahan ang eleksiyon pabor kang Trump.

Gitudlo ni William Barr, nga Attorney General ni Trump niadtong panahona, ang laing special counsel nga si John Durham niadtong 2019 aron susihon ang posibleng mga sayop sa FBI.

Sa usa ka taho niadtong 2023, nakahinapos si Durham nga kulang ang FBI sa "actual evidence" aron imbestigahan ang 2016 presidential campaign ni Trump ug sobra kining nagsalig sa mga impormasyong gihatag sa iyang mga kaatbang sa politika aron ipadayon ang imbestigasyon.

Gipasakaan sa Justice Department ni Trump og kasong kriminal si Comey niadtong miaging tuig, usa sa pipila ka mga kaatbang sa presidente nga giatubang og mga kaso. Giakusahan siya sa paghatag og bakak nga mga pahayag ug pagbabag sa Kongreso human siya akusahi nga namakak bahin sa pagtugot sa pagpanghatag og impormasyon ngadto sa news media. Apan sa ulahi, gibasura sa usa ka federal judge ang kaso human nakaplagan nga ilegal ang pagtudlo sa prosecutor nga personal nga gipili ni Trump aron magpasaka og kaso batok kang Comey.

Si Steele, nga nagtrabaho sa usa ka opposition research firm nga gikuha sa usa ka law firm alang sa kampanya ni Clinton ug sa Democratic National Committee, naghimo og dossier nga naglakip sa mga alegasyon sa koneksiyon tali sa kampanya ni Trump ug sa Russia, ingon man sa uban pang kontrobersiyal nga mga akusasyon, nga pulos gilimod ni Trump.

-Ato ni Bai