Supreme Court mipabor sa conviction sa bana sa psychological violence

MANILA – Gipabilin sa Supreme Court (SC) ang desisyon sa Court of Appeals (CA) nga silotan og hangtod walo ka tuig nga pagkabilanggo ang usa ka lalaki human mapamatud-ang sad-an sa psychological violence ubos sa Republic Act (RA) 9262, o Anti-Violence Against Women and Their Children Act.

Sa usa ka pahayag niadtong Biyernes, gipasiugda pag-usab sa SC nga dili ang marital infidelity mismo ang giisip nga krimen ubos sa RA 9262, kondili ang psychological violence nga kauban niini nga maoy hinungdan sa mental o emotional suffering sa kapikas.

“One form of domestic violence punished by RA 9262 is psychological violence committed through marital infidelity, which not only transgresses the matrimonial vows of faithfulness and commitment, but inflicts inconceivable psychological and emotional harm upon the aggrieved spouse and their children,” matod sa korte.

Nagminyo ang magtiayon niadtong 1999 ug nagsugod ang ilang mga problema niadtong 2009, sa dihang kanunay nang ulahi mouli ang bana ug nahimong layo sa iyang pamilya.

Niadtong Enero 2010, nagpadala ang bana og mga text message sa iyang asawa nga nag-ingong dili na siya mopauli, gusto siyang magsugod og bag-ong kinabuhi nga mag-inusara ug tuyo niyang mangayo nga ipawalay-bisa ang ilang kaminyoon.

Sa ulahi, nahibaloan sa asawa nga nagpuyo ang iyang bana uban sa laing babaye.

Mipamatuod usab ang anak nga lalaki sa magtiayon nga nakita niya ang iyang inahan nga naghilak ug depressed sulod sa kapin duha ka tuig human gibiyaan sa iyang amahan ang pamilya.

Miuyon ang SC sa desisyon sa CA ug Regional Trial Court, nga nakakaplag nga sad-an ang bana ug nagmando kaniya nga mobayad og PHP130,000 nga multa ug danyos.

“There is no question that marital infidelity, especially that which causes mental and emotional suffering on the innocent spouse, cannot, in any degree, be condoned by the Court for the same is not only contrary to the constitutional principle of inviolability of marriage as well as public policy but also penalized by law,” mabasa sa desisyon sa SC Second Division.

Gitino sa SC nga igo ang testimonya sa asawa, psychological evaluation ug mga testimonya sa ubang saksi aron mapamatud-an nga ang mga binuhatan sa iyang bana maoy hinungdan sa iyang mental ug emotional suffering.

-Ato ni Bai