Senior Associate Justice Marvic Leonen Mahimong Acting Chief Justice sa Supreme Court

Miingon ang Supreme Court (SC) niadtong Martes nga si Senior Associate Justice Marvic Leonen ang mahimong acting chief justice samtang gihulat ang pagtudlo sa mopuli kang Chief Justice Alexander Gesmundo.

Moabot si Gesmundo, ang ika-27 nga Chief Justice sa nasud, sa mandatory retirement age nga 70 anyos sa Nobyembre 6.

Sa usa ka pahayag, miingon si SC spokesperson Camille Ting nga ang Section 12 sa Republic Act (RA) 296, o Judiciary Act of 1948, naglatid nga kon bakante ang posisyon sa Chief Justice, “the duties and powers of the Chief Justice shall be exercised by the most senior Associate Justice until a new Chief Justice is appointed and qualified.”

Ubos sa 1987 Constitution, adunay 90 ka adlaw ang Presidente aron magtudlo og permanenteng mopuli gikan sa shortlist nga ihatag sa Judicial and Bar Council (JBC).

Subay sa naandang pamaagi sa JBC, giimbitar ang lima ka labing senior nga Supreme Court Associate Justices nga mo-apply isip chief justice isip preferred candidates.

Sila mao si Leonen ug Associate Justices Alfredo Benjamin Caguioa, Ramon Paul Hernando, Henri Jean Paul Inting, ug Rodil Zalameda.

Niadtong Lunes, gi-nominate ni retired SC Associate Justice Arturo Brion si Associate Justice Midas Marquez isip sunod nga chief justice.

Nagsilbi usab si Marquez isip chief of staff ni former chief justice Reynato Puno, chief sa Public Information Office, ug spokesperson sa Court.

Gitakda sa JBC sa Oktubre 13 ang deadline sa mga aplikasyon ug nominasyon alang sa posisyon sa chief justice.

Sa usa ka Palace press briefing niadtong Martes, miingon si Palace Press Officer Claire Castro nga dili manghilabot si President Ferdinand R. Marcos Jr. sa mga kalihokan sa hudikatura.

-Ato ni Bai