Senator Legarda Nagpalugway sa Medical Leave Hangtod Oktubre 9

Gipalugway ni Senator Loren Legarda ang iyang medical leave hangtod Oktubre 9, sumala kang Senate Secretary Renato Bantug Jr. niadtong Lunes.

Gikumpirma ni Bantug nga ang bag-ong giaprobahang leave ni Legarda naglangkob sa tulo ka yugto: Setyembre 21 hangtod 23, Setyembre 28 hangtod Oktubre 2, ug Oktubre 5 hangtod 9.

Naka-medical leave si Legarda sukad Agosto 3 ug kataposang nakita sa Senate chamber atol sa plenary session niadtong Hulyo 29. Una nang gibutyag ni Senator Juan Miguel Zubiri nga nagpatambal si Legarda sa gawas sa nasod tungod sa seryosong sakit sa baga. Matod ni Zubiri, gusto nang mobalik ni Legarda sa Pilipinas, apan wala pa matino ang iyang pagpauli tungod sa nagpadayong medical tests.

Samtang, gipaambit ni Senator Panfilo Lacson nga nakigkontak si Legarda sa iyang mga kauban aron mangayo og pagdasig, apan wala siya maghisgot kon kanus-a siya mobalik.

“Nagkausap kami ni Senator Loren. Twice na kaming nagkakausap. Wala naman siyang nabanggit kung siya ay babalik o hindi,” matod ni Lacson sa usa ka interview. “Ang appeal niya sa amin, bilang kasamahan sa Senado, parang humingi lang siya ng moral support.”

Nahimo ang pagpalugway sa medical leave samtang nag-atubang si Legarda ug ang iyang anak nga si Batangas 1st District Representative Leandro Leviste og plunder ug graft charges. Naggikan ang mga reklamo sa mga alegasyon nga napakyas ang renewable energy firm ni Leviste sa pagsuplay og solar power sumala sa gimando sa congressional franchise niini. -Ato ni Bai