Senator Legarda, Leviste nagsumite og counter-affidavit sa P10.44-B plunder case

Nagsumite sila Senator Loren Legarda ug iyang anak nga si Batangas Rep. Leandro Leviste sa ilang counter-affidavit sa plunder complaint nga giimbestigahan sa Office of the Ombudsman.

Gipahayag ni Ombudsman Jesus Crispin “Boying” Remulla niadtong Biyernes nga ulahi nang nasumite ang counter-affidavit, apan konsiderahon gihapon kini sa mga imbestigador samtang nagpadayon ang preliminary investigation.

“Nag-file na sila ng counter-affidavit. Late finile 'yung counter-affidavit, if I am right, but we’re not going to get them on any technicality; we will still consider the counter-affidavit,” matod ni Remulla.

Gimandoan sa Ombudsman sila Legarda ug Leviste nga motubag sa mga alegasyon kalabot sa giingong wala makompletong solar energy projects nga nagkantidad og P10.44 bilyon. Gipahibalo niadtong ulahing bahin sa Hulyo ang plunder complaint batok sa mag-inahan.

Gipasabot ni Remulla nga nakadawat og impormasyon ang mga imbestigador nga nagpabilin sa Paris ang duha ka mambabalaod, bisan nakabiyahe usab sila ngadto sa Switzerland.

Gilaum sa Ombudsman nga molungtad hangtod 60 ka adlaw ang preliminary investigation, ug human niini mahimong ipagawas ang desisyon bahin sa complaint.

Gipahayag nila Legarda ug Leviste nga wala silay nahimong sayop kalabot sa mga alegasyon.

Kasamtangang naka-extended medical leave si Legarda gikan sa Senate tungod sa sakit nga may kalabotan sa iyang baga.

-Ato ni Bai