top of page
Bai (150 x 150 px) (100 x 100 px).png

Senate minority, nanawagan og dayalogo ug due process sa kaso ni Bato

Nanawagan ang minority bloc sa Senado sa gobyerno nga unahon ang dayalogo ug malinawong pagsulbad sa kaso ni Senator Ronald “Bato” dela Rosa, samtang gipasiugda ang panginahanglan nga respetuhon ang iyang katungod sa due process ug malikayan ang pagkawala sa kinabuhi.

Paraluman News; Gihubad ni Herli Mae Virador, Ato ni Bai

October 24, 2026 at 3:04:28 PM

Si Senador Ronald “Bato” dela Rosa nga naglingkod samtang naminaw sa usa ka hearing sa Senado.

Miingon ang minority bloc nga andam silang motabang sa pagpadali sa mga panaghisgot tali sa kampo ni Dela Rosa ug sa gobyerno aron makahimo og legal nga proseso diin madungog ug matubag ang mga alegasyon batok sa senador.

Facebook page ni Senator Ronald dela Rosa

Nanawagan ang minority bloc sa Senado sa gobyerno nga unahon ang dayalogo ug malinawong pagsulbad sa kaso ni Senator Ronald “Bato” dela Rosa, samtang gipasiugda ang panginahanglan nga respetuhon ang iyang katungod sa due process ug malikayan ang pagkawala sa kinabuhi.


Sa usa ka pahayag, miingon ang minority bloc nga andam silang motabang sa pagpahigayon og mga panaghisgot tali sa kampo ni Dela Rosa ug sa gobyerno aron makab-ot ang legal nga proseso diin mahimong madungog ug matubag ang mga alegasyon batok sa senador.


Giawhag usab sa grupo ang executive branch, mga ahensiya sa pagpatuman sa balaod, si Dela Rosa ug ang iyang pamilya ug legal counsel, ingon man ang iyang mga tigpaluyo, nga magpugong sa ilang mga lihok ug magpadayon sa bukas nga komunikasyon.


“Walang Pilipinong dapat mamatay para lamang mapatunayan ng sinuman ang kanyang punto,” matod sa minority bloc.


Miingon ang grupo nga nasabtan nila ang tinguha sa gobyerno nga masulbad ang maong isyu aron mapadayon ang balaod ug kahusay. Bisan pa niini, nagtuo silang posible gihapon ang malinawong solusyon nga nagtahod sa balaod ug nanalipod sa kinabuhi.


Gikutlo sa minority bloc ang baruganan ni Interior Secretary Jonvic Remulla nga mas pabor sa negosasyon kaysa sa usa ka operasyon nga mahimong mosangpot sa pagkawala sa kinabuhi.


Giawhag usab niini ang gobyerno nga konsiderahon ang mga publikong pahayag ni Dela Rosa nga andam siyang moatubang sa mga alegasyon ug kaso batok kaniya sa mga korte sa Pilipinas, ingon man ang iyang panawagan alang sa malinawong suporta, isip basihan sa dayalogo.


Gihatagan usab og gibug-aton sa grupo ang panginahanglan nga panalipdan ang soberanya sa Pilipinas ug ang mga katungod sa mga Pilipino. Gihisgotan niini ang pag-atras sa nasod gikan sa Rome Statute niadtong 2019 ug ang naunang pagdumili ni President Ferdinand Marcos Jr. sa pakigtambayayong sa imbestigasyon sa International Criminal Court (ICC) tungod sa isyu sa soberanya.


Gipunting usab sa grupo ang kalainan nga gihimo sa administrasyon tali sa pakigtambayayong sa Interpol ug sa pakigtambayayong sa ICC.


Aron ipasabot ang ilang baruganan, naghatag ang grupo og pananglitan sa posibleng pagbisita sa Manila ni Russian President Vladimir Putin, nga adunay ICC arrest warrant. Matod nila, gilaoman nga susihon pag-ayo sa mga awtoridad ang mga balaod sa Pilipinas, internasyonal nga mga obligasyon, ug ang angay nga mga proseso sa dili pa mohimo og bisan unsang pagdakop.


Bisan giila sa minority bloc nga lahi ang legal nga mga kahimtang, miingon kini nga si Dela Rosa, isip usa ka Pilipinong anaa sa iyang kaugalingong nasod, angay usab nga hatagan og samang maampingong pagkonsiderar sa iyang mga katungod.


-Paraluman News; Gihubad ni Herli Mae Virador, Ato ni Bai

bottom of page