Senado mopadayon sa budget hearings samtang temporaryong mohunong ang impeachment trial

Gamiton sa Senado ang temporaryong paghunong sa impeachment trial ni Vice President Sara Duterte aron ipadayon ang mga deliberasyon sa gisugyot nga 2027 national budget, matod ni Senate President Sherwin Gatchalian niadtong Sabado.

Matod ni Gatchalian, magsugod ang budget hearings sa Oktubre 13 samtang giandam sa prosecution ang mga dokumentong gikinahanglan alang sa pormal nga pagpresentar sa mga ebidensiya batok kang Duterte.

Gitakda ang impeachment proceedings sa Oktubre 12 ug 13, samtang ang budget deliberations ipahigayon gikan Oktubre 13 hangtod 16, matod niya.

“Since paperwork naman, papeles naman ‘yung gagawin, submission na lang naman ng mga ebidensya," matod ni Gatchalian sa usa ka interview.

"Gagamitin natin ‘yung oras para sa budget deliberations,” dugang niya.

Gidungan sa Senado ang impeachment trial ug ang pagrepaso sa gisugyot nga 2027 national budget, nga matod ni Gatchalian, layo pa sa katunga ang nahuman nga paghisgot niini tungod kay daghang ahensiya sa gobyerno ang wala pa makapresentar sa ilang mga budget proposal.

“Gusto natin na quality ‘yung trabaho, quality din ‘yung debate, quality analysis. At ‘yun ang challenge,” matod niya.

Miingon usab siya nga posibleng magkinahanglan ang Senado og dugang duha ka adlaw aron mahuman ang pagsusi kang prosecution witness Alexander Cabrera, usa ka financial forensic expert nga ang testimonya naglakip sa mga alegasyon sa unexplained wealth batok kang Duterte.

Matod ni Gatchalian, ang dugang panahon maglakip sa cross-examination sa depensa ug mga pangutana gikan sa senator-judges.

Bisan pa nga importante ang testimonya ni Cabrera sa mga alegasyon sa prosecution, gipasiugda ni Gatchalian nga kinahanglan nga independente nga susihon sa senator-judges ang mga ebidensiya ug ang pamaagi nga gigamit sa eksperto aron makuha ang iyang mga nakaplagan.

-Ato ni Bai