Senado Miuyon sa Pagsaulog sa Line Workers Appreciation Day

Giaprobahan sa Senado niadtong Martes sa ikaduhang pagbasa ang duha ka lakang nga nagtumong sa pag-ila sa kontribusyon sa mga electrical ug telecommunications line workers ug paghatag kanila og dugang nga proteksyon batok sa mga risgo sa trabaho.

Pangunang gisulat ni Senator Francis “Chiz” Escudero, ang Senate Bill Nos. 2484 ug 2485 nagtumong sa pag-ila sa papel sa mga line worker sa pagpabalik sa importanteng mga serbisyo human sa mga kalamidad ug pagmintinar sa mga sistema sa kuryente ug telekomunikasyon sa nasod.

Ang SB 2484, o National Line Workers Appreciation Day Act, nagsugyot nga ideklarar ang unang Lunes sa Agosto matag tuig isip adlaw sa pag-ila sa mga electrical line worker ug sa ilang kontribusyon sa paghatag og kuryente sa nasod.

Samtang, ang SB 2485, o Line Workers Insurance and Benefits Act, mag-obligar sa mga employer nga hatagan ang mga line worker og labing menos P300,000 nga insurance coverage alang sa kamatayon o pagkabaldado tungod sa mga risgo sa trabaho.

Ang gisugyot nga insurance idugang sa mga benepisyo nga gihatag ubos sa social security laws, collective bargaining agreements, ug kasamtangang mga polisiya sa kompanya.

Obligado usab ang mga employer nga mobayad sa tibuok insurance premiums. Ang dili motuman mahimong multahan gikan P300,000 hangtod P500,000.

Apil usab sa proteksyon sa maong lakang ang mga line worker nga temporaryong ipadala ngadto sa ubang mga entidad alang sa emerhensiyang pagpabalik o pag-ayo sa serbisyo, aron magpadayon ang ilang proteksyon bisan nagtrabaho sila gawas sa lugar nga sakop sa ilang regular nga employer.

Matod ni Escudero, gitumong sa mga lakang nga matubag ang mga risgo nga giatubang sa mga trabahante nga nagtabang sa pagpabalik sa serbisyo sa kuryente ug telekomunikasyon, ilabina panahon sa mga kalamidad.

“Hindi lamang kuryente ang ibinabalik ng ating mga line workers tuwing may sakuna. Binabalik nila ang pag-asa at normal na pamumuhay ng ating mga kababayan,” matod niya.

“Ang Senate Bill 2484 ay pagkilala sa kanilang serbisyo, samantalang ang Senate Bill 2485 ay nagbibigay ng kasiguruhan na kapag may nangyaring masama, may benepisyo at proteksyong nakalaan para sa kanila at sa kanilang pamilya,” dugang sa beteranong magbabalaod.

Gihubit sa duha ka lakang ang “line workers” isip mga tawo nga direktang nalambigit sa pagtukod, pagbutang, pagsusi, pagmintinar, pagpahiuli, ug pag-ayo sa electrical transmission ug distribution systems, ingon man sa telecommunications lines ug mga pasilidad nga may kalabotan niini.

Apil sa maong kahulugan ang mga linya nga anaa sa ibabaw ug ilalom sa yuta.

Gisulat usab uban ni Escudero nila Senate President Sherwin Gatchalian ug Senator Erwin Tulfo ang SB 2484, samtang kauban sa pagsulat sa SB 2485 sila Senators Jinggoy Estrada, Raffy Tulfo, ug Erwin Tulfo. -Ato ni Bai