Senado miaprobar sa balaodnon nga motabang sa mga OFW nga mopauli sa Pilipinas

Giaprobahan sa Senado ang usa ka balaodnon nga magtukod og sistema sa tibuok nasud aron matabangan ang mga Overseas Filipino Workers (OFWs) nga makabalik sa normal nga pagpuyo ug pagpanginabuhi sa Pilipinas human sa ilang pagpauli gikan sa gawas sa nasud.

Giaprobahan ang Senate Bill No. 2423, o Bagong Balikbayan Act, sa ikatulo ug kataposang pagbasa niadtong Huwebes, nga nakakuha og 17 ka boto pabor niini, nga walay misupak o midumili sa pagboto.

Ang balaodnon, nga gipasiugdahan ni Senator Raffy Tulfo, nagtumong nga pulihan ang nagkabulag-bulag ug hamubo nga mga programa sa pagtabang sa mga OFW nga mopauli, pinaagi sa usa ka komprehensibong sistema nga motabang kanila sa nagkalain-laing yugto sa ilang pagpangabroad.

"For our OFWs who persevered and sacrificed in other countries, and endured long periods of separation from their families, their return home should not mark the end of the dreams they started. Instead, their return should serve as the signal to further expand their livelihoods," matod ni Tulfo.

Sakop sa gisugyot nga sistema ang mga OFW nga nagtrabaho sa yuta ug sa dagat, adunay dokumento man o wala, lakip ang mga mipauli tungod sa kalisod ug mga trabahanteng nanginahanglan og dugang nga tabang sama sa mga tigulang ug nag-inusarang ginikanan.

Ubos sa balaodnon, sugdan sa Department of Migrant Workers (DMW) ang paghatag og tambag ug giya sa mga OFW unom ka bulan sa dili pa sila mopauli. Ang tabang magpunting sa upat ka bahin: edukasyon ug pagpalambo sa kahanas o Kaalaman, suporta sa pangisip ug emosyon o Kalinga, pagnegosyo o Negosyo, ug pagpanarbaho o Hanapbuhay.

Gimando usab sa balaodnon ang pagtukod sa Returnee-OFWs Management Information System (ROMIS) aron mas dali nga makapangita og trabaho nga angay sa kahanas sa mga OFW. Hatagan usab sila og kahigayonan nga makaapil sa mga job fair, makakwalipikar sa mga trabaho sa gobyerno pinaagi sa civil service eligibility, ug makatrabaho isip magtutudlo.

Alang sa mga OFW nga gustong magnegosyo, naglakip ang balaodnon og pagbansay sa pagdumala sa negosyo, paggiya gikan sa mga eksperto, ug mga programa sa pagpahulam og puhunan nga himoon uban sa mga institusyong pinansyal.

Kabahin usab sa programa ang tabang sa sosyal nga panginahanglan ug panglawas, diin ang Department of Social Welfare and Development (DSWD) maoy mohatag og sosyal nga tabang, samtang ang Department of Health (DOH) maoy mohatag og espesyal nga pagtambag alang sa kahimsog sa pangisip.

Gikinahanglan usab sa balaodnon ang mga panalipod batok sa diskriminasyon tungod sa edad ug mga programa nga motubag sa nagkalain-laing panginahanglan sa mga trabahante base sa ilang gender.

Matod ni Tulfo, gikinahanglan ang usa ka komprehensibong sistema ilabina karong adunay mga tensiyon tali sa mga nasud ug panagbangi sa nagkalain-laing rehiyon nga mahimong hinungdan sa kalit nga pagkawala sa trabaho, pagbiya sa pinuy-anan, ug dinaliang pagpauli sa mga Pilipinong trabahante.

"With escalating regional conflicts and shifting geopolitical landscapes, thousands of our countrymen face sudden displacement, unexpected job losses, and emergency repatriations. In times of emergency, we should not be groping in the dark," matod ni Tulfo. -Ato ni Bai